អ្នកនាំពាក្យសភាចិន លោក Lou Qinjian បានថ្លែងនៅថ្ងៃពុធ (៤ មីនា) នេះថា ប្រទេសចិន មានឆន្ទៈក្នុងការធ្វើការជាមួយសហរដ្ឋអាមេរិក ដើម្បីជំរុញការប្រាស្រ័យទាក់ទងគ្នានៅគ្រប់កម្រិត ប៉ុន្តែទីក្រុងប៉េកាំង ក៏នៅតែប្រកាន់ខ្ជាប់នូវ «បន្ទាត់ក្រហម» និងគោលការណ៍របស់ខ្លួនជានិច្ច។

សភាប្រជាជនចិន នឹងបើកសម័យប្រជុំប្រចាំឆ្នាំរបស់ខ្លួននៅថ្ងៃព្រហស្បតិ៍ ស្អែកនេះ ដើម្បីបង្ហាញពីគោលដៅសេដ្ឋកិច្ច និងអាទិភាពគោលនយោបាយសម្រាប់ឆ្នាំ២០២៦នេះ។ កិច្ចប្រជុំនោះនឹងធ្វើឡើងក្នុងគ្រាដ៏រសើបនៃទំនាក់ទំនងរវាងចិន និងអាមេរិក ខណៈភាគីទាំងពីរកំពុងស្វះស្វែងរក្សាស្ថិរភាពនៃចំណងមិត្តភាព មុនពេលកិច្ចប្រជុំកំពូលដែលរំពឹងទុក រវាងមេដឹកនាំអាមេរិក លោក Donald Trump និងសមភាគីចិន លោក Xi Jinping ក្នុងទីក្រុងប៉េកាំង នាចុងខែមីនា ខាងមុខនេះ។

លោក Lou បានលើកឡើងថា ប្រទេសចិន និងសហរដ្ឋអាមេរិក គួរតែគោរពគ្នាទៅវិញទៅមក និងមានសន្តិសហវិជ្ជមានជាមួយគ្នា។ លោកបានប្រាប់សន្និសីទសារព័ត៌មានថា៖ «ចិនមានគោលការណ៍ និងបន្ទាត់ក្រហមផ្ទាល់ខ្លួន ហើយចិននឹងការពារយ៉ាងម៉ឺងម៉ាត់នូវអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ខ្លួនជានិច្ច»។

លោក Lou បានបន្ថែមថា ការទូតរវាងប្រមុខរដ្ឋមាន «តួនាទីយុទ្ធសាស្ត្រដែលមិនអាចខ្វះបាន» ក្នុងការដឹកនាំទំនាក់ទំនងរវាងប្រទេសទាំងពីរ។ មន្ត្រីសេតវិមានមួយរូបបានបញ្ជាក់ថា លោក Trump នឹងធ្វើដំណើរទស្សនកិច្ចទៅកាន់ប្រទេសចិន ចាប់ពីថ្ងៃទី៣១ ខែមីនា ដល់ថ្ងៃទី២ ខែមេសា ប៉ុន្តែទីក្រុងប៉េកាំង មិនទាន់មានការប្រកាសជាផ្លូវការនោះទេ៕