រដ្ឋមន្ត្រីការបរទេសអាមេរិក លោក Marco Rubio បានប្រាប់អ្នកសារព័ត៌មានកាលពីថ្ងៃអង្គារថា ពលរដ្ឋអាមេរិក ៩.០០០នាក់ បានចាកចេញពីមជ្ឈិមបូព៌ា ចាប់តាំងពីប្រតិបត្តិការយោធារវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ បានចាប់ផ្តើម។

លោកបាននិយាយថា ពលរដ្ឋអាមេរិកប្រហែល ១.៥០០នាក់ផ្សេងទៀត ដែលមានបំណងចាកចេញ បានស្នើសុំជំនួយ។

លោក Rubio បានរាយការណ៍ថា ក្រសួងការបរទេសកំពុងបន្តរៀបចំជើងហោះហើរជួល ជើងហោះហើររបស់យោធា និងពាណិជ្ជកម្ម ដើម្បីជួយពលរដ្ឋអាមេរិកឲ្យជម្លៀសចេញ។

លោកបាននិយាយថា យន្តហោះមួយចំនួន បានចេញដំណើរ ហើយកំពុងហោះហើរ ប៉ុន្តែក្រោយមកត្រូវត្រឡប់ក្រោយវិញ ដោយសារតែការបិទដែនអាកាសភ្លាមៗនៅក្នុងតំបន់នោះ។