ក្រុមអ្នកវិភាគនៅមជ្ឈិមបូព៌ាបានប្រាប់សារព័ទ៌មានរ៉យទ័រថា ការវាយប្រហារតាមអាកាសរបស់អ៊ីរ៉ង់ លើបណ្ដារដ្ឋនៅតំបន់ឈូងសមុទ្រ អាចជំរុញពួកគេឱ្យចូលទៅក្នុងសម្ព័ន្ធភាពដ៏ធំទូលាយមួយជាមួយសហរដ្ឋអាមេរិក និងពង្រីកសង្គ្រាមប្រឆាំងនឹងអ៊ីរ៉ង់ បន្ទាប់ពីការវាយប្រហារលើកំពង់ផែ ទីក្រុង និងកន្លែងផលិតប្រេងនានានៅក្នុងមជ្ឈិមបូព៌ា ដែលជាតំបន់ផលិតថាមពលដ៏សំខាន់មួយ។

ក្រុមអ្នកវិភាគបាននិយាយថា ការវាយប្រហារសងសឹករបស់អ៊ីរ៉ង់ លើខ្សែជីវិតសេដ្ឋកិច្ចរបស់រដ្ឋឈូងសមុទ្រ ដើម្បីឆ្លើយតបទៅនឹងការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែលលើប្រទេសរបស់ខ្លួន គឺអាចរុញឱ្យរដ្ឋឈូងសមុទ្រ កាន់តែខិតទៅជិតទីក្រុងវ៉ាស៊ីនតោន និងឆ្ពោះទៅរកសកម្មភាពសម្របសម្រួលប្រឆាំងនឹងសាធារណរដ្ឋអ៊ិស្លាមមួយនេះ។

អ្នកវិភាគបន្តទៀតថា គោលបំណងនៃការវាយប្រហារប្រឆាំងនឹងរដ្ឋឈូងសមុទ្រចំនួន៦ ដែលទាំងអស់នោះសុទ្ធតែជាសម្ព័ន្ធមិត្តរបស់សហរដ្ឋអាមេរិក និងមានមូលដ្ឋានយោធាអាមេរិក គឺដើម្បីធានាថា ប្រទេសទាំងនោះដាក់សម្ពាធលើលោកប្រធានាធិបតីសហរដ្ឋអាមេរិក Donald Trump ឱ្យបញ្ឈប់សង្គ្រាម ប៉ុន្តែអ៊ីរ៉ង់ ហាក់ដូចជាបានគណនាខុសហើយ។

លោក Abdulaziz Sager ប្រធានមជ្ឈមណ្ឌលស្រាវជ្រាវមានមូលដ្ឋាននៅអារ៉ាប៊ីសាអ៊ូឌីត បាននិយាយថា៖ ឥឡូវនេះ បណ្ដារដ្ឋឈូងសមុទ្រប្រឈមនឹងការជ្រើសរើសដ៏លំបាក ខណៈជម្រើសនៃអព្យាក្រឹតភាពបានថយចុះ នៅពេលដែលមីស៊ីលអ៊ីរ៉ង់ ចាប់ផ្តើមធ្លាក់លើទឹកដីខ្លួន ដែល «បង្ខំរដ្ឋទាំងនោះឱ្យក្លាយជាសត្រូវរបស់អ៊ីរ៉ង់» ហើយក៏ជំរុញឱ្យបណ្ដារដ្ឋដែលធ្លាប់តែមានជំហររារែក ឱ្យងាកទៅខាងសហរដ្ឋអាមេរិកយ៉ាងចំហ និងត្រៀមខ្លួនដើម្បីការពារទឹកដី និងផលប្រយោជន៍របស់ពួកគេ៕