រដ្ឋមន្រ្តីក្រសួងការបរទេសស្រីលង្កាលោក Vijitha Herath និយាយថា ប្រទេសរបស់លោក បានជួយសង្រ្គោះទាហានជើងទឹករងរបួសធ្ងន់ ៣២នាក់ នៅលើនាវាចម្បាំង IRIS Dena របស់អ៊ីរ៉ង់ដែលបានលិចនៅថ្ងៃពុធនេះ នៅក្រៅដែនសមុទ្រប្រទេសកោះមួយនេះ ។

ពុំមានព័ត៌មានភ្លាមៗនោះទេពីមូលហេតុនៃការផ្ទុះបណ្តាលឲ្យនាវាចម្បាំងអ៊ីរ៉ង់លិច ប៉ុន្តែលោក Herath និយាយប្រាប់សភាថា ទាហានជើងទឹករងរបួស ត្រូវបាននាំទៅកាន់មន្ទីរពេទ្យនៅតំបន់ភាគខាងត្បូងស្រីលង្កា ។

នាវាចម្បាំងមាននាវិក ១៨០នាក់ មួយគ្រឿងនេះ បានទូរស័ព្ទស្នើសុំការសង្រ្គោះនៅពេលព្រឹក ថ្ងៃពុធ ។ ក្រសួងការពារជាតិស្រីលង្កា និយាយថា ពួកគេកំពុងស្វែងរកក្រុមនាវិកផ្សេងទៀតនៅលើនាវា IRIS Dena ដែលបានលិចនៅចម្ងាយប្រហែល ៤០គ.ម ពីស្រីលង្កា ។

លោក Herath និយាយថា នាវាកងទ័ពជើងទឹកស្រីលង្កា ២គ្រឿង និងយន្តហោះ ១គ្រឿង ត្រូវបានដាក់ពង្រាយ ដើម្បីចុះប្រតិបត្តិការជួយសង្រ្គោះ ប៉ុន្តែរូបលោកពុំបាននិយាយពីមូលហេតុអ្វីដែលបណ្តាលឲ្យនាវាចម្បាំងមួយគ្រឿងនេះលិចនោះទេ ។

មន្រ្តីមួយរូបនិយាយប្រាប់ទីភ្នាក់ងារព័ត៌មាន AFPថា ពួកយើងកំពុងចុះប្រតិបត្តិការស្វែងរកមនុស្សបាត់ខ្លួន ប៉ុន្តែពួកយើងពុំទាន់បានដឹងនោះទេថាតើមានរឿងអ្វីកើតឡើងចំពោះក្រុមនាវិកផ្សេងទៀត ។

សមាជិកសភាមកពីគណបក្សប្រឆាំងមួយរូប បានសួរទៅសភាថាតើ នាវាចម្បាំងមួយគ្រឿងនេះ ត្រូវបានគេទម្លាក់គ្រាប់បែកឬយ៉ាងណា ដែលជាផ្នែកមួយនៃការវាយប្រហារកំពុងបន្តរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ ប៉ុន្តែគ្មានការឆ្លើយតបភ្លាមៗពីរដ្ឋាភិបាលនោះទេ ។

អ្នកនាំពាក្យកងទ័ពជើងទឹកស្រីលង្កាលោក Buddhika Sampath និយាយដែរថា ប្រតិបត្តិការរបស់ពួកគេ ស្របតាមកាតព្វកិច្ចសមុទ្ររបស់ស្រីលង្កា ហើយទាហានជើងទឹកអ៊ីរ៉ង់ ៣២នាក់ ត្រូវបានជម្លៀសទៅកាន់មន្ទីរពេទ្យធំ ស្ថិតក្នុងទីក្រុង Galle ដែលមានចម្ងាយ ១១៥គ.ម នៅភាគខាងត្បូងរដ្ឋធានី Colombo ៕