រដ្ឋមន្ត្រីការពារជាតិអ៊ីស្រាអែល Israel Katz បានគំរាមសម្លាប់អ្នកណាដែលក្លាយជាមេដឹកនាំកំពូលបន្ទាប់របស់អ៊ីរ៉ង់ ក្រោយពីការស្លាប់របស់អតីតមេដឹកនាំលោក Ayatollah Ali Khamenei។

លោករដ្ឋមន្ត្រីបានសរសេរនៅលើប្រព័ន្ធផ្សព្វផ្សាយសង្គម X ថា៖«មេដឹកនាំណាម្នាក់ ដែលត្រូវបានតែងតាំងដោយរបបភេរវកម្មអ៊ីរ៉ង់ ដើម្បីបន្តផែនការបំផ្លាញអ៊ីស្រាអែល គំរាមកំហែងសហរដ្ឋអាមេរិក ពិភពលោកសេរី និងប្រទេសនានាក្នុងតំបន់ និងគាបសង្កត់ប្រជាជនអ៊ីរ៉ង់ នឹងក្លាយជាគោលដៅនៃការសម្លាប់ដាច់ខាត»។

យោងតាមលោក Katz អ៊ីស្រាអែលមានបំណងសម្លាប់មេដឹកនាំកំពូលអ៊ីរ៉ង់បន្ទាប់ «ដោយមិនគិតពីឈ្មោះ ឬកន្លែងលាក់ខ្លួនរបស់បុគ្គលនោះទេ»។

លោកបានកត់សម្គាល់ថា ការសម្រេចចិត្តពាក់ព័ន្ធ ត្រូវបានធ្វើឡើងរួចហើយ។ លោករដ្ឋមន្ត្រី បាននិយាយថា៖«នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) និងខ្ញុំបានណែនាំកងកម្លាំងការពារជាតិ   អ៊ីស្រាអែលឲ្យរៀបចំ និងចាត់វិធានការចាំបាច់ទាំងអស់ ដើម្បីសម្រេចបាននូវគោលបំណងនេះ ដែលជាផ្នែកសំខាន់មួយនៃប្រតិបត្តិការតោគ្រហឹម (Roaring Lion)។ យើងនឹងបន្តធ្វើសកម្មភាពដោយអស់ពីសមត្ថភាពរបស់យើងជាមួយដៃគូអាមេរិករបស់យើង ដើម្បីកម្ទេចសមត្ថភាពរបស់របបនេះ និងបង្កើតលក្ខខណ្ឌសម្រាប់ប្រជាជនអ៊ីរ៉ង់ ដើម្បីផ្តួលរំលំ និងជំនួសរបបនេះ៕