ឯកអគ្គរដ្ឋទូតអ៊ីរ៉ង់ប្រចាំប្រទេសរុស្ស៊ី លោក Kazem Jalali បាននិយាយនៅក្នុងអត្ថបទមួយសម្រាប់សារព័ត៌មាន TASSថា ការសម្លាប់មេដឹកនាំកំពូលរបស់ប្រទេសនេះ លោក Ali Khamenei គឺជាឧទាហរណ៍នៃការញុះញង់បង្កឲ្យមានការស្អប់ខ្ពើមខាងសាសនា។ 

លោកបានសរសេរថា៖«ក្រៅពីទិដ្ឋភាពផ្លូវច្បាប់ ការវាយប្រហារលើឥស្សរជនសាសនាជាន់ខ្ពស់ គឺជាឧទាហរណ៍ច្បាស់លាស់នៃការញុះញង់ការស្អប់ខ្ពើមខាងសាសនា និងចេតនាធ្វើឲ្យអ្នកជឿមានអារម្មណ៍អាក់អន់ចិត្ត»។

លោក Jalali ក៏បានគូសបញ្ជាក់ពីផលវិបាកផ្នែកច្បាប់នៃឧប្បត្តិហេតុនេះផងដែរ។ លោកបានលើកឡើង ថា៖«ក្នុងអំឡុងពេលសកម្មភាពឈ្លានពានទាំងនេះ ដែលគ្មានភស្តុតាងត្រឹមត្រូវតាមផ្លូវច្បាប់នៅក្នុងក្របខ័ណ្ឌនៃការការពារស្របច្បាប់ក្រោមមាត្រា ៥១ នៃធម្មនុញ្ញអង្គការសហប្រជាជាតិ សហរដ្ឋអាមេរិក និងរបបអ៊ីស្រាអែល បានរំលោភដោយចេតនាលើអភ័យឯកសិទ្ធិផ្លូវច្បាប់ និងផ្ទាល់ខ្លួនរបស់មន្ត្រីជាន់ខ្ពស់បំផុតនៃសាធារណរដ្ឋឥស្លាមអ៊ីរ៉ង់ គឺលោក Ayatollah Khamenei»។

លោក Jalali បានសង្កត់ធ្ងន់ថា៖«តាមទស្សនៈនៃច្បាប់អន្តរជាតិ ស្របតាមអនុសញ្ញាអន្តរជាតិ និងការអនុវត្តតុលាការ ប្រមុខរដ្ឋទទួលបានអភ័យឯកសិទ្ធិពេញលេញពីការឈ្លានពានណាមួយលើទឹកដីដែលតំណាងឲ្យអធិបតេយ្យភាពជាតិ។ ដូច្នេះ សកម្មភាពនេះ គួរតែត្រូវបានចាត់ទុកថា ជាការរំលោភបំពានយ៉ាងធ្ងន់ធ្ងរលើបទដ្ឋានជាមូលដ្ឋាននៃទំនាក់ទំនងអន្តរជាតិទាក់ទងនឹងការការពារ និងការផ្តន្ទាទោសចំពោះឧក្រិដ្ឋកម្មប្រឆាំងនឹងបុគ្គលដែលស្ថិតនៅក្រោមការការពាររបស់អន្តរជាតិ»៕