នៅថ្ងៃពុធ (ទី៤ ខែមីនា ឆ្នាំ២០២៦) នេះ ប្រព័ន្ធផ្សព្វផ្សាយរដ្ឋលីបង់ បានរាយការណ៍ថា កងទ័ពអ៊ីស្រាអែលបានចូលទៅក្នុងទីក្រុង Khiam នៅភាគខាងត្បូងនៃប្រទេសលីបង់ ដោយមានចម្ងាយប្រហែល ៦គីឡូម៉ែត្រ ពីព្រំដែនលីបង់-អ៊ីស្រាអែល។

ប្រព័ន្ធផ្សព្វផ្សាយរដ្ឋបានឲ្យដឹងថា៖ «ទីក្រុង Khiam កំពុងមានការបាញ់ផ្លោងកាំភ្លើងធំជាបន្តបន្ទាប់ ខណៈដែលកងទ័ពសត្រូវ គឺអ៊ីស្រាអែល បានចូលទៅក្នុងទីក្រុងនេះ»។

ប្រភពមួយពីយោធាលីបង់ បានប្រាប់សារព័ត៌មាន AFP កាលពីថ្ងៃអង្គារថា អ៊ីស្រាអែលបានបើកការឈ្លានពានផ្លូវគោកចូលទៅក្នុងតំបន់ព្រំដែន នៅភាគខាងត្បូងនៃប្រទេសលីបង់ ស្របគ្នានឹងយុទ្ធនាការវាយប្រហារតាមអាកាសរបស់ខ្លួន។

អ៊ីស្រាអែលបានពង្រីកការវាយប្រហារតាមអាកាសរបស់ខ្លួនលើលីបង់ នៅថ្ងៃពុធនេះ ដោយកំណត់គោលដៅលើតំបន់ នៅជុំវិញវិមានប្រធានាធិបតី នៅជិតទីក្រុងបេរូត និងតំបន់ផ្សេងទៀតនៅភាគខាងត្បូងនៃរដ្ឋធានីនេះ ក៏ដូចជាបន្ទាយរបស់ក្រុមសកម្មប្រយុទ្ធហេសបូឡាដែលគាំទ្រដោយអ៊ីរ៉ង់ ដោយបានសម្លាប់មនុស្សយ៉ាងហោចណាស់ ១១នាក់។

ជាមួយគ្នានេះ យោធាអ៊ីស្រាអែលបានប្រាប់ប្រជាជនដែលរស់នៅភាគខាងត្បូងនៃទន្លេ Litani របស់លីបង់ឲ្យធ្វើដំណើរទៅភាគខាងជើងជាបន្ទាន់ នៅថ្ងៃពុធនេះ ដោយព្រមានថា កងទ័ពត្រូវបាន «បង្ខំឲ្យចាត់វិធានការយោធា» ប្រឆាំងនឹងក្រុមហេសបូឡា នៅក្នុងតំបន់នេះ។

គួរបញ្ជាក់ថា លីបង់ត្រូវបានអូសទាញចូលទៅក្នុងសង្គ្រាម នៅតំបន់មជ្ឈិមបូព៌ា កាលពីថ្ងៃចន្ទ នៅពេលដែលក្រុមហេសបូឡាបានវាយប្រហារអ៊ីស្រាអែល ជាការឆ្លើយតបទៅនឹងការសម្លាប់មេដឹកនាំកំពូលអ៊ីរ៉ង់ លោក Ayatollah Ali Khamenei អំឡុងការវាយប្រហារ ដោយសហរដ្ឋអាមេរិក និងអ៊ីស្រាអែល កាលពីចុងសប្តាហ៍កន្លងទៅ៕