ក្រសួងការពារជាតិទួរគី និយាយថា មីស៊ីលបាលីស្ទិកបាញ់ចេញពីអ៊ីរ៉ង់ និងហោះឆ្ពោះទៅកាន់ដែនអាកាសទួរគី ក្រោយឆ្លងកាត់ប្រទេសស៊ីរី និងអ៊ីរ៉ាក់ ត្រូវបានបំផ្លាញដោយប្រព័ន្ធការពារដែនអាកាសអង្គការណាតូ ។

ក្រសួងបាននិយាយនៅក្នុងសេចក្តីថ្លែងការណ៍នាថ្ងៃពុធនេះថា មីស៊ីលបាលីស្ទិកបាញ់ចេញពីអ៊ីរ៉ង់ ដែលត្រូវបានរកឃើញឆ្លងកាត់ដែនអាកាសអ៊ីរ៉ាក់ និងស៊ីរី ហើយហោះឆ្ពោះទៅកាន់ដែនអាកាសទួរគី ត្រូវបានចូលរួមទាន់ពេលវេលាដោយកងកម្លាំងការពារដែនអាកាស និងមីស៊ីលរបស់អង្គការណាតូដែលឈរជើងនៅតំបន់ភាគខាងកើតសមុទ្រមេឌីទែរ៉ាណេ ។

ពួកគេបន្តថា គ្មានគ្រោះថ្នាក់ ឬអ្នករងរបួសនោះទេ ហើយទីក្រុងអង់ការ៉ា រក្សាសិទ្ធិក្នុងការឆ្លើយតបចំពោះសកម្មភាពអរិភាពណាមួយប្រឆាំងនឹងខ្លួន ខណៈព្រមានភាគីពាក់ព័ន្ធឲ្យអត់ធ្មត់ ចៀសវាងការកើនឡើងជម្លោះ ។

មូលដ្ឋានទ័ព Incirlik នៅប្រទេសទួរគី ត្រូវបានប្រើប្រាស់ដោយកងកម្លាំងយោធាបរទេស ដែលច្រើនជាកងកម្លាំងសហរដ្ឋអាមេរិក និងសម្ព័ន្ធមិត្តផ្សេងទៀតរបស់អង្គការណាតូ ។ មូលដ្ឋានទ័ពនេះ ស្ថិតក្រោមការគ្រប់គ្រងរបស់កងទ័ពអាកាសទួរគី ប៉ុន្តែប្រតិបត្តិការជាមូលដ្ឋានទ័ពអាកាសរួមគ្នារវាងទួរគី និងសហរដ្ឋអាមេរិក ៕