​បាល់ទាត់​៖ ​ក្លិប​ដែល​កំពុងមាន​វិបត្តិ​ហិរញ្ញវត្ថុ​ធ្ងន់ធ្ងរ​នៅ​ក្របខណ្ឌ League One អង់គ្លេស Wigan Athletic ត្រូវបាន​ស្រោង​ស្រង់​ឲ្យ​ងើប​ពី​វិបត្តិ ​ក្រោយ​សម្ព័ន្ធ​អ្នកជំនួញ​បា​រ៉ែ​ន​ដែល​គ្រប់គ្រង​ដោយ​លោក Abdulrahman Al-Jasmi​។

​​Wigan Athletic បាន​ធ្លាក់​ក្នុង​វិបត្តិ​ជ្រៅ ​និង​បានប្រកាស​រក​អ្នកគ្រប់គ្រង​ថ្មី​កាលពី​ខែកក្កដា​ ឆ្នាំ ២០២០ កន្លងទៅ​។ ​​វិបត្តិ​ហិរញ្ញវត្ថុ​របស់ Wigan ​ធ្វើឲ្យ​អតីត​ក្រុម​ដែល​ធ្លាប់​លេង​នៅ Premier League មួយ​នេះ​ធ្លាក់​ចេញពី​ក្របខណ្ឌ League Championship ទៅ​ក្របខណ្ឌ League One ដែលជា​លី​គ​លំដាប់​ទី៣ នៅ​អង់គ្លេស​។​ ​​ការ​ចូលមក​វិនិយោគ​ និង​កាន់កាប់​ដោយ​ក្រុម​អ្នកជំនួញ​បា​រ៉ែ​នេះ ក៏ត្រូវ​រង់ចាំ​ការសំរេច​ចុង​ក្រោយពី English Football League ដែរ ដែល​គេ​គ្រោង​នឹង​សំរេច​រួចរាល់​នៅ​ថ្ងៃទី៣១ ខែមីនា​នេះ​។ ​​លោក Talal Al-Hammad​ ដែល​នឹង​ក្លាយទៅជា​ប្រធាន​ក្លិប Wigan ​នោះបាន​សន្យាថា​ នឹង​លើកមុខ​លើក​មាត់ Wigan ​ឡើងវិញ​។​

​​សូមបញ្ជាក់ថា មុនពេល Wigan​ ឈានដល់​កិច្ចព្រមព្រៀង ​ជាមួយ​សម្ព័ន្ធ​អ្នកជំនួយ​បា​រ៉ែ​ន​នេះ មាន​ភាគី ១០ផ្សេងទៀត​បាន​ប្រជែង​ក្នុងការ​វិនិយោគ​។ ​​បច្ចុប្បន្ន Wigan ​កំពុង​ឈរ​លេខ ២១ ក្នុង​តារាង​ក្របខណ្ឌ League One ខណៈ​កំពុង​ពុះពារ​ឲ្យ​រួច​ផុតពី​ការចោល​ទៅ​លី​គ​ទី៤ រឺ​ហៅថា League Two តែ​ក្លិប​កំពុង​គ្មាន​អ្នកចាត់ការ​នៅឡើយ​ ដោយ​ពេលនេះ​កំពុង​ដឹកនាំ​ដោយ​គ្រូបង្វឹក​បណ្តោះអាសន្ន​ បន្ទា​ប់​ពី​លោក John Sheridan ចាក​ចេញទៅ​ដឹកនាំ Swindon Town តាំងពី​ខែវិច្ឆិកា​៕

​អត្ថបទ​៖​នាង សុភា​វុ​ធ