ភ្នំពេញ៖ នៅថ្ងៃទី២៤ ខែមីនានេះ កាកបាទក្រហមកម្ពុជា ទីស្នាក់ការកណ្តាល បាន​ទទួល​ថវិកា​ពី​សប្បុសរជន​ចំនួន ៤ក្រុមផ្សេងៗគ្នា ដែលបានចូលរួមឧបត្ថម្ភថវិកាតាមសទ្ធាជ្រះថ្លា ជូនដល់​កាក​បាទ​ក្រហម​កម្ពុជា ក្នុងឱកាសខួបទី១៥៩ ទិវាពិភពលោកកាកបាទក្រហម និងអឌ្ឍចន្ទ​ក្រហម​៨ឧសភា​ឆ្នាំ២០២២ ក្រោមប្រធានបទ «ទាំងអស់គ្នារួមជាមួយ កាកបាទក្រហមកម្ពុជា ដោះស្រាយ​បញ្ហា​ប្រឈមនានា និងបន្តពង្រឹងភាពធន់សហគមន៍» សម្រាប់ទុកបន្ត ជួយ​សង្គ្រោះដល់ ប្រជាពលរដ្ឋដែលរងគ្រោះមហន្តរាយផ្សេងៗ ដោយមិនប្រកាន់និន្នាការអ្វីទាំងអស់។ 

ដើម្បីចូលរួមក្នុងវិស័យមនុស្សធម៌ជាមួយ កាកបាទក្រហមកម្ពុជា ក្នុងឱកាសខួបទី១៥៩ ទិវាពិភពលោក កាកបាទក្រហម និងអឌ្ឍចន្ទក្រហម៨ឧសភាឆ្នាំ២០២២ នៅថ្ងៃទី២៤ ខែ មីនា​នេះ មាន​សប្បុជន​ចំនួន​៤​ក្រុមផ្សេងៗគ្នា បានចូលរួម​បរិច្ឆាគថវិកាជូនដល់កាកបាទ​ក្រហម​កម្ពុជាសរុបបានចំនួន ៥១៨១៨ដុល្លារ និង១លាន២សែនរៀល។ ថវិកាទាំងនេះបានទទួលពីក្រុមសប្បុរសជនរួមមាន៖

ទី១. ក្រុមគ្រួសារ​សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន

ទី២. ក្រុមគ្រួសារភិរិយាមន្រ្តីថ្នាក់ដឹកនាំ៣នាក់ផ្សេងទៀត ដែលដឹកនាំដោយលោកជំទាវ ងួន ធួន មិនឃិន

ទី៣. លោក ផែង វណ្ណះ

ទី៤. ក្រុមមន្រ្តី បុគ្គលិក អគ្គលេខាធិការដ្ឋានកាកបាទក្រហមកម្ពុជា

លោកជំទាវ ពុំ ចន្ទីនី អគ្គលេខាធិកា កាកបាទក្រហមកម្ពុជា បានឱ្យដឹងថា សម្រាប់​សប្បុរស​ជន​គ្រប់​មជ្ឈដ្ឋាន ដែលមានសទ្ធាជ្រះថ្លា ចូលរួមបរិច្ចាគថវិកា ជូនកាកបាទក្រហមក្រហមកម្ពុជា ក្នុង​ឱកាស​ខួបលើកទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម៨ឧសភា ២០២២នេះ គឺដើម្បីធ្វើឱ្យសមាគមជាតិមានធនធានបន្តផ្តល់សេវាកម្មមនុស្សធម៌ ដោះស្រាយ​បញ្ហា​ប្រឈម​នានា បន្តពង្រឹងភាពធន់សហគមន៍ និងជួយសម្រាលទុក្ខលំបាក ជូនប្រជាពលរដ្ឋ​រង​គ្រោះ និងងាយរងគ្រោះបំផុត តាមគោលការណ៍គ្រឹះរបស់ចលនាអន្តរជាតិ កាកបាទក្រហម និងអឌ្ឍចន្ទក្រហម។ នេះជាទង្វើមួយជួយដល់សង្គម និងអាចជួយឲ្យប្រជាជនខ្មែរ ដែល​កំពុង​ជួប​ការ​លំបាក ទទួលបាននូវភាពកក់ក្តៅ និងការយកចិត្តទុកដាក់យ៉ាងពេញលេញពីរាជរដ្ឋាភិបាល និងសប្បុរសជនគ្រប់ទិសទីផងដែរ៕ អត្ថបទ៖ សំ ងីម