គណៈកម្មការរៀបចំការបោះឆ្នោតរបស់ប្រទេសថៃ បានអនុម័តជាផ្លូវការនូវលទ្ធផល សម្រាប់អាសនៈចំនួន ៤៩៩ ក្នុងចំណោម ៥០០ នៅក្នុងការបោះឆ្នោតសកល កាលពីខែកុម្ភៈ ដោយការប្រកាសនេះបើកផ្លូវឲ្យមានការកោះប្រជុំសភាថ្មី ហើយដំណើរការបង្កើតរដ្ឋាភិបាលថ្មីមួយ។

យោងតាមច្បាប់ សភាថ្មីត្រូវតែប្រជុំក្នុងរយៈពេល ១៥ថ្ងៃ បន្ទាប់ពីមានការទទួលស្គាល់ផ្លូវការនេះ។ សភានឹងជ្រើសរើសប្រធានសភា និងអនុប្រធានសភា ហើយបន្ទាប់មកនឹងជ្រើសរើសនាយករដ្ឋមន្ត្រី ដែលនឹងចាប់ផ្ដើមមានវិធានការ ដើម្បីបង្កើតរដ្ឋាភិបាល។

ការអះអាងនូវលទ្ធផលនេះ បង្ហាញថា គណបក្សភូមិចៃថៃ (Bhumjaithai) របស់លោកនាយករដ្ឋមន្ត្រី Anutin Charnvirakul ទទួលបាន ១៩១អាសនៈ ដោយតាមមកដោយគណបក្សប្រជាជន (People’s Party) ១២០អាសនៈ គណបក្សភឿថៃ (Pheu Thai) ៧៤អាសនៈ និងគណបក្សក្លាថាំ (Kla Tham) ៥៨អាសនៈ។

មន្ត្រីម្នាក់ពីគណបក្សភូមិចៃថៃម បានប្រាប់សារព័ត៌មាន Reuters ថា រដ្ឋាភិបាលថ្មីមួយត្រូវបានគេរំពឹងថា នឹងចាប់ផ្តើមធ្វើការនៅក្នុងខែមេសា។

យ៉ាងណាក្ដី គណៈកម្មការបានឲ្យដឹងថា ខ្លួននៅតែត្រូវការពេលវេលា ដើម្បីស៊ើបអង្កេតពាក្យបណ្តឹងចំនួន ២៤៦ករណី ដែលទាក់ទងនឹងការបោះឆ្នោតនេះ៕