រយៈពេលជិតប្រាំមួយខែបន្ទាប់ពីរលកបាតុកម្មដ៏កម្រោលដឹកនាំដោយយុវជន និងការស្លាប់របស់មនុស្ស ៧៧នាក់ បានបង្ខំឱ្យនាយករដ្ឋមន្ត្រីនេប៉ាល់នៅពេលនោះគឺលោក K.P. Sharma Oli លាលែងពីតំណែង ប្រជាជននេប៉ាល់បានចាប់ផ្តើមបោះឆ្នោតនៅថ្ងៃព្រហស្បតិ៍ ទី៥ ខែមីនា ឆ្នាំ២០២៦ នេះ នៅក្នុងការបោះឆ្នោតសកលមួយ ដើម្បីជ្រើសរើសសភាថ្មីនៅក្នុងប្រទេសតំបន់ភ្នំហិមាល័យមួយនេះ ដែលប្រជាពលរដ្ឋសង្ឈឹមថា នឹងអាចនាំឱ្យមានការផ្លាស់ប្ដូរ។

ម្ចាស់ឆ្នោតប្រហែល ១៩ លាននាក់ នៃប្រជាជននេប៉ាល់សរុបប្រមាណ ៣០ លាននាក់ មានសិទ្ធិបោះឆ្នោតជ្រើសរើសសមាជិកសភាចំនួន ២៧៥ រូប តាមរយៈប្រព័ន្ធបោះឆ្នោតចម្រុះ ដោយក្នុងនោះមាន ១៦៥ អាសនៈ តាមរយៈការបោះឆ្នោតផ្ទាល់ (គឺឈ្នះបានអាសនៈ) និង ១១០ អាសនៈទៀត តាមរយៈប្រព័ន្ធសមាមាត្រ។

យោងតាមគណៈកម្មាធិការរៀបចំការបោះឆ្នោតរបស់ប្រទេសនេះ ការបោះឆ្នោតចាប់ផ្តើមនៅម៉ោងក្នុងស្រុក ៧ព្រឹក និងបិទនៅម៉ោង ៥ ល្ងាច ហើយការរាប់សន្លឹកឆ្នោតគ្រោងនឹងចាប់ផ្តើមភ្លាមៗបន្ទាប់ពីនោះ។ លទ្ធផលបឋម ទំនងជានឹងលេចចេញជារូបរាងនៅថ្ងៃសុក្រ ទី៦ ខែមីនា ស្អែកនេះ ប៉ុន្តែលទ្ធផលពេញលេញអាចនឹងត្រូវចំណាយពេលមួយសប្តាហ៍ ឬលើសពីនេះ។

ដោយស្ថិតនៅចន្លោះចិននិងឥណ្ឌា នេប៉ាល់ត្រូវបានញាំញីដោយអស្ថិរភាពនយោបាយអស់ជាច្រើនទសវត្សរ៍ ដែលធ្វើឱ្យប៉ះពាល់យ៉ាងធ្ងន់ធ្ងរដល់សេដ្ឋកិច្ច។ វិបត្តិដ៏រ៉ាំរ៉ៃចាក់ឫសយ៉ាងជ្រៅនេះ បានផ្ទុះឡើងជាបាតុកម្មតាមដងផ្លូវកាលពីខែកញ្ញាឆ្នាំមុន ដែលបញ្ឆេះឡើងដោយបម្រាមបណ្ដាញសង្គម និងបាននាំមនុស្សរាប់ពាន់នាក់ចុះតាមដងផ្លូវ រហូតឈានដល់មានការប៉ះទង្គិចគ្នា និងការបាត់បង់ជីវិត។

លោក Oli បានចូលរួមប្រកួតប្រជែងម្ដងទៀតក្នុងការបោះឆ្នោតថ្ងៃព្រហស្បតិ៍នេះ រួមជាមួយបេក្ខជនជាង ៣.៤០០ នាក់ផ្សេងទៀត មកពី ៦៥ គណបក្ស។ បក្សដែលកំពុងនាំមុខគេសម្រាប់ការបោះឆ្នោតនេះ គឺបក្សដែលទើបបង្កើតបាន ៣ឆ្នាំឈ្មោះ Rastriya Swatantra Party (RSP) ដោយបេក្ខជននាយករដ្ឋមន្ត្រីរបស់ខ្លួន គឺលោក Balendra Shah ជាអតីតតារាចម្រៀងរ៉េបដ៏មានប្រជាប្រិយភាពដែលបានក្លាយជាអ្នកនយោបាយ៕