ទូរទស្សន៍រដ្ឋបានរាយការណ៍ថា អ៊ីរ៉ង់បានប្រកាសថា ពិធីបុណ្យសពផ្លូវរដ្ឋសម្រាប់មេដឹកនាំកំពូល Ayatollah Ali Khamenei ដែលត្រូវបានគ្រោងទុកសម្រាប់ល្ងាចថ្ងៃពុធ ៤ មីនា សប្ដាហ៍នេះ នៅទីក្រុងតេអេរ៉ង់ ត្រូវបានពន្យារពេល ដោយសារការរំពឹងទុកនៃអ្នកចូលរួមច្រើនមិនធ្លាប់មាន ខណៈការវាយប្រហារពីកងកម្លាំងអាមេរិក និងអ៊ីស្រាអែលទូទាំងប្រទេសនៅតែបន្ត។

មន្ត្រីអ៊ីរ៉ង់ម្នាក់បាននិយាយថា មានសំណើជាច្រើនពីប្រជាពលរដ្ឋដែលចង់ចូលរួមក្នុងព្រឹត្តិការណ៍រយៈពេល៣ថ្ងៃនៅបរិវេណបួងសួងក្នុងទីក្រុង តេអេរ៉ង់។

ទូរទស្សន៍រដ្ឋអ៊ីរ៉ង់បាននិយាយបន្ទាប់ពីលោក Khamenei ត្រូវបានសម្លាប់ក្នុងវ័យ ៨៦ ឆ្នាំក្នុងការវាយប្រហាររបស់អាមេរិក-អ៊ីស្រាអែលកាលពីចុងសប្តាហ៍ថា ពិធីលាចុងក្រោយសម្រាប់មេដឹកនាំកំពូលដែលត្រូវបានសម្លាប់ ត្រូវបានពន្យារពេល ហើយកាលបរិច្ឆេទថ្មីនឹងត្រូវបានប្រកាសនៅពេលក្រោយ។

កាលពីព្រឹកថ្ងៃពុធ ក្រុមអាជ្ញាធរបាននិយាយថា ការគោរពវិញ្ញាណក្ខន្ធនឹងធ្វើឡើងនៅល្ងាចដដែលនោះនៅទីក្រុងតេអេរ៉ង់ មុនពេលសាកសពរបស់លោក Khamenei ត្រូវបានបញ្ចុះនៅក្នុងទីក្រុង Mashhad ដ៏ពិសិដ្ឋ ដែលជាស្រុកកំណើតរបស់លោក។

ការវាយប្រហារបានស្រោចលើទីក្រុងតេអេរ៉ង់ចាប់តាំងពីថ្ងៃសៅរ៍មក ដោយមីស៊ីលដែលកំណត់គោលដៅហេដ្ឋារចនាសម្ព័ន្ធយោធា និងរដ្ឋាភិបាល។

ក្រុមអាជ្ញាធរមិនបានភ្ជាប់ការពន្យារពេលនេះ ទៅនឹងស្ថានភាពសន្តិសុខនោះទេ។

លោក Mohsen Mahmoudi ប្រធានក្រុមប្រឹក្សាសម្របសម្រួលអភិវឌ្ឍន៍អ៊ីស្លាមរបស់ទីក្រុងតេអេរ៉ង់ និយាយថា ការពន្យារពេលនេះមួយផ្នែកដោយសារតែ ការចូលរួមដែលរំពឹងទុករបស់មនុស្សរាប់លាននាក់ និងភាពចាំបាច់ក្នុងការរៀបចំហេដ្ឋារចនាសម្ព័ន្ធត្រឹមត្រូវ សម្រាប់ហ្វូងមនុស្សបែបនេះ៕