ប្រទេសចិននឹងបង្កើនថវិកាការពារជាតិរបស់ខ្លួនសម្រាប់ឆ្នាំនេះចំនួន៧ភាគរយ ជាការធ្លាក់ចុះបន្តិចពីការកើនឡើង ៧,២ភាគរយកាលពីឆ្នាំមុន ក្នុងពេលមានការប្រជែងគ្នាជាយុទ្ធសាស្ត្រជាមួយសហរដ្ឋអាមេរិក ភាពតានតឹងនៅច្រកសមុទ្រតៃវ៉ាន់ និងជម្លោះកាន់តែរាលដាលនៅមជ្ឈិមបូព៌ា។

យោងតាមរបាយការណ៍សេចក្តីព្រាងថវិកាដែលប្រព័ន្ធផ្សព្វផ្សាយ CNA បានឃើញនៅថ្ងៃព្រហស្បតិ៍ ទី ៥ ខែមីនានេះ បានឲ្យដឹងថា ថវិកានេះនឹងកើនឡើងដល់ ២៧៦,៩ ពាន់លានដុល្លារអាមេរិក។ ឯកសារនេះត្រូវបានកំណត់ឱ្យចេញផ្សាយភ្លាមៗ នៅពេលដែលនាយករដ្ឋមន្ត្រីចិន លោក លី ឈាំង (Li Qiang) ថ្លែងពីរបាយការណ៍ការងាររបស់រដ្ឋាភិបាលនៅក្នុងពេលបើកសម័យប្រជុំសភាប្រជាជនជាតិ (NPC)។

ប្រទេសចិនបានបង្កើនថវិកាការពារជាតិប្រចាំឆ្នាំរបស់ខ្លួនចំនួន ៧,២ ភាគរយក្នុងរយៈពេលបីឆ្នាំកន្លងទៅនេះ។ តួលេខខ្ពស់បំផុត ត្រូវបានចេញផ្សាយជារៀងរាល់ឆ្នាំនៅក្នុងសម័យប្រជុំពីរលើក រួមមានការជួបប្រជុំសភាប្រជាជនជាតិ (NPC) និងកិច្ចប្រជុំនៃស្ថាប័នប្រឹក្សានយោបាយកំពូលរបស់ប្រទេស។

កិច្ចប្រជុំនៅឆ្នាំនេះ ធ្វើឡើងនៅពេលដែលប្រទេសចិនចាប់ផ្តើមអនុវត្តផែនការប្រាំឆ្នាំលើកទី១៥របស់ខ្លួន ដែលនឹងកំណត់យុទ្ធសាស្ត្រសេដ្ឋកិច្ចរហូតដល់ឆ្នាំ២០៣០។

ការចំណាយលើវិស័យការពារជាតិរបស់ប្រទេសចិន ត្រូវបានតាមដានយ៉ាងដិតដល់ជាសូចនាករនៃអាទិភាពយុទ្ធសាស្ត្ររបស់ទីក្រុងប៉េកាំង ក្នុងពេលមានភាពតានតឹងនៅច្រកសមុទ្រតៃវ៉ាន់ និងសមុទ្រចិនខាងត្បូង ព្រមទាំងការប្រកួតប្រជែងរវាងចិន និងសហរដ្ឋអាមេរិក កាន់តែខ្លាំងឡើង។

ជម្លោះដែលកំពុងកើនឡើងនៅមជ្ឈិមបូព៌ា កំពុងសាកល្បងសន្តិសុខប្រេង និងភាពជាដៃគូឈូងសមុទ្ររបស់ប្រទេសចិន ដែលបានធ្វើឱ្យការព្រួយបារម្ភអំពីសន្តិសុខសកលកាន់តែខ្លាំងឡើង។