លោក Scott Bessent រដ្ឋមន្ត្រីក្រសួងរតនាគារសហរដ្ឋអាមេរិកបាននិយាយកាលពីថ្ងៃពុធ ទី៤ ខែមីនា ថា ការដំឡើងពន្ធសកល១៥ភាគរយរបស់លោក Donald Trump ទំនងជាត្រូវបានដាក់ឲ្យអនុវត្តនៅសប្តាហ៍នេះ ខណៈប្រធានាធិបតីសហរដ្ឋអាមេរិកមានចំណាត់ការរៀបចំឡើងវិញនូវរបៀបវារៈពាណិជ្ជកម្មរបស់លោក បន្ទាប់ពីមានការរារាំងផ្នែកច្បាប់ដ៏ធំ។

កាលពីខែមុន តុលាការកំពូលបានលុបចោលការដំឡើងពន្ធជាក់លាក់របស់លោក Trump ដែលលោកបានដាក់កាលពីឆ្នាំមុនលើសម្ព័ន្ធមិត្ត និងដៃគូប្រកួតប្រជែង ដោយធ្វើឲ្យមានការរិះគន់យ៉ាងខ្លាំងចំពោះគោលនយោបាយសេដ្ឋកិច្ចដ៏សំខាន់របស់លោក។

ចាប់តាំងពីពេលនោះមក មេដឹកនាំសហរដ្ឋអាមេរិក បានប្រើប្រាស់ច្បាប់ផ្សេងទៀតដើម្បីដាក់ការដំឡើងពន្ធថ្មី១០ភាគរយ និងបានសន្យាថានឹងបង្កើនកម្រិតដំឡើងពន្ធដល់១៥ភាគរយ។

នៅពេលត្រូវបានសួរថា តើការដំឡើងពន្ធនឹងត្រូវបានអនុវត្តនៅពេលណា នោះលោក Bessent បានប្រាប់ប្រព័ន្ធផ្សព្វផ្សាយ CNBC ថា «វាទំនងជានៅពេលណាមួយក្នុងសប្តាហ៍នេះ»។

លោកបាននិយាយបន្ថែមថា នេះនឹងត្រូវបានធ្វើឡើងក្រោមមាត្រា១២២ នៃច្បាប់ពាណិជ្ជកម្មឆ្នាំ ១៩៧៤ ជាមូលដ្ឋានដូចគ្នាសម្រាប់ការដំឡើងពន្ធថ្មី១០ភាគរយរបស់លោក Trump ដែលអនុញ្ញាតឱ្យមានការដំឡើងពន្ធរយៈពេល១៥០ថ្ងៃប៉ុណ្ណោះ ហើយលុះត្រាតែសភាបន្តរយៈពេល។