មន្ត្រីប្រទេសទួរគី បាននិយាយកាលពីថ្ងៃពុធ ទី៤ ខែឧសភា ថា មីស៊ីលបាលីស្ទីកមួយគ្រាប់ដែលបាញ់ចេញពីប្រទេសអ៊ីរ៉ង់ ហើយចូលទៅដែនអាកាសប្រទេសទួរគីតាមប្រទេសអ៊ីរ៉ាក់ និងស៊ីរី ត្រូវបានបំផ្លាញដោយប្រព័ន្ធការពារដែនអាកាសរបស់សម្ព័ន្ធយោធាណាតូ។ ក្រសួងការពារជាតិ បាននិយាយថា វាត្រូវបានចូលរួមនិងបំផ្លាញដោយឧបករណ៍ការពារដែនអាកាសនិងមីស៊ីលរបស់ណាតូ ដែលត្រូវបានដាក់ពង្រាយនៅភាគខាងកើតសមុទ្រមេឌីទែរ៉ាណេ។

ក្រសួង មិនបានបញ្ជាក់ពីគោលដៅដែលមីស៊ីលនោះសំដៅទៅលើអ្វីនោះទេ។ អ៊ីរ៉ង់បានវាយប្រហារទីតាំងនានានៅទូទាំងតំបន់ក្នុងការសងសឹកបន្ទាប់ពីសហរដ្ឋអាមេរិក និងអ៊ីស្រាអែល បានបើកការវាយប្រហារទៅលើខ្លួនកាលពីថ្ងៃសៅរ៍។ មន្ត្រីទួរគីម្នាក់ បាននិយាយថា មីស៊ីលត្រូវបានតម្រង់គោលដៅទៅលើមូលដ្ឋានទ័ពមួយកន្លែងនៅកោះស៊ីប ខាងប្រទេសក្រិក ប៉ុន្តែបានភ្លាត់ចេញពីគោលដៅ។

មន្ត្រីនិយាយថា បំណែកដែលធ្លាក់នៅក្នុងស្រុក Dortyol ភាគខាងត្បូងប្រទេសទួរគី ជិតព្រំដែនស៊ីរី ត្រូវបានគេកំណត់អត្តសញ្ញាណថាជាបំណែកនៃឧបករណ៍ស្ទាក់ចាប់ដែលប្រើប្រាស់ដើម្បីបំផ្លាញ «ការគំរាមកំហែងនៅលើអាកាស»។ ប៉ុន្តែពុំមានអ្នកស្លាប់ និងរងរបួសត្រូវបានរាយការណ៍ទេ។

អ្នកនាំពាក្យក្រសួងការបរទេស លោក Tommy Pigott បាននិយាយថា ឆ្លើយតបទៅនឹងឧប្បត្តិហេតុនេះ រដ្ឋមន្ត្រីការបរទេសអាមេរិក លោក Marco Rubio បាននិយាយនៅក្នុងការសន្ទនាតាមទូរស័ព្ទជាមួយរដ្ឋមន្ត្រីការបរទេសទួរគី លោក Hakan Fidan ថា «ការវាយប្រហារលើទឹកដីអធិបតេយ្យភាពទួរគី គឺមិនអាចទទួលយកបានទេ ហើយបានសន្យាគាំទ្រយ៉ាងពេញទំហឹងពីសហរដ្ឋអាមេរិក» ។