កាលពីថ្ងៃពុធ (៤ មីនា) ចៅក្រមនៃតុលាការពាណិជ្ជកម្មសហរដ្ឋអាមេរិក បានបង្គាប់ឱ្យរដ្ឋាភិបាលចាប់ផ្តើមសងប្រាក់វិញ រួមទាំងការប្រាក់ ដែលអាចមានចំនួនរហូតដល់រាប់ពាន់លានដុល្លារ ទៅឱ្យក្រុមអ្នកនាំចូលដែលបានបង់ពន្ធគយដ៏ទូលំទូលាយរបស់លោកប្រធានាធិបតី Donald Trump បន្ទាប់ពីតុលាការកំពូលបានសម្រេចកាលពីខែមុនថា ប្រាក់ពន្ធនោះជាការប្រមូលដោយខុសច្បាប់។

ឯកសារតុលាការបានឱ្យដឹងថា ចៅក្រម Richard Eaton នៃតុលាការពាណិជ្ជកម្មអន្តរជាតិសហរដ្ឋអាមេរិក ប្រចាំតំបន់ Manhattan បានបង្គាប់ឱ្យរដ្ឋាភិបាលសម្រេចបញ្ចប់ការគណនាថ្លៃដើមនៃការនាំចូលទំនិញរាប់លានជើង ចូលទៅកាន់សហរដ្ឋអាមេរិក ដោយមិនបូកបញ្ចូលពន្ធគយឡើយ។ លោកក៏បានបង្គាប់ឱ្យមានការសងប្រាក់ពន្ធគយនោះវិញ រួមជាមួយនឹងការប្រាក់ផងដែរ។

គួរឱ្យដឹងថា នៅពេលទំនិញត្រូវបាននាំចូលទៅអាមេរិក អ្នកនាំចូលត្រូវបង់ប្រាក់ក្នុងចំនួនប៉ាន់ស្មានមួយនៅពេលទំនិញទៅដល់ ហើយចំនួននោះនឹងត្រូវសម្រេចជាស្ថាពរនៅប្រហែល ៣១៤ ថ្ងៃក្រោយមក ដែលជាដំណើរការមួយហៅថា «ការទូទាត់បញ្ជី»។

លោកចៅក្រម Eaton បានណែនាំឱ្យទីភ្នាក់ងារគយ និងការពារព្រំដែន (CBP) សម្រេចលើថ្លៃដើមនាំចូលនៃទំនិញទាំងនោះដោយមិនបូកបញ្ចូលពន្ធ ហើយសងប្រាក់ពន្ធដែលលើសនោះ ត្រឡប់ទៅវិញ។ លោកបាននិយាយថា ភ្នាក់ងារនេះគួរតែអាចរៀបចំប្រព័ន្ធរបស់ខ្លួនដើម្បីចេញប្រាក់សំណង ដែលជាកិច្ចការធ្វើឡើងជាទៀងទាត់ នៅពេលអ្នកនាំចូលបង់ប្រាក់លើសពីការប៉ាន់ស្មាន។

នៅក្នុងឯកសារតុលាការ ទីភ្នាក់ងារ CBP លើកឡើងថា ភារកិច្ចក្នុងការសម្រេចថ្លៃដើមនាំចូលដោយមិនគិតពន្ធគយនេះ គឺជា «រឿងមិនធ្លាប់មានពីមុនមក» បើគិតតាមទំហំការងារ ហើយអាចតម្រូវឱ្យមានការត្រួតពិនិត្យដោយផ្ទាល់លើឯកសារនាំចូលច្រើនជាង ៧០ លានច្បាប់។ នៅក្នុងឯកសារតុលាការផ្សេងទៀត ភ្នាក់ងារនេះបានបញ្ជាក់ថា ខ្លួនចង់បានពេលវេលារហូតដល់ ៤ ខែ ដើម្បីវាយតម្លៃលើជម្រើសនានាក្នុងការសងប្រាក់វិញ៕