​អ៊ុយក្រែន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ថ្លែង​ទៅកាន់​សមាជិកសភារបស់​ប្រទេស​ជប៉ុនកាលពី​ថ្ងៃ​ពុធ ​ដោយ​ជំរុញ​ឱ្យ​បន្ត​កិច្ចខិតខំ​ដើម្បី​ដាក់ទណ្ឌកម្ម​លើ​ប្រទេស​រុស្ស៊ី ក្នុងអំឡុងពេល​ថ្លែង​សុន្ទរកថា​តាមបណ្តាញ​វីដេអូ​នៅ​ទីក្រុង​តូ​ក្យូ​។

​លោក Zelenskyy គឺជា​មេដឹកនាំ​ដំបូង​គេ​ដែល​ថ្លែង​ទៅកាន់​សមាជិកសភា​ជប៉ុន​នៅក្នុង​សភា ហើយ​លោក​បាន​អរគុណប្រទេស​ជប៉ុន​សម្រាប់​ការគាំទ្រ​អ៊ុយ​ក្រែ​ន ​បន្ទាប់ពី​ការវាយលុក​ចូល​របស់រុស្ស៊ី​។ នាយករដ្ឋមន្ត្រី​ជប៉ុនលោក Fumio Kishida បាន​តាមដាន​មើល​សុន្ទរកថា​របស់លោក Zelenskyy​។​ ​លោក Zelenskyy បាន​អង្វរ​សមាជិកសភា​ប្រទេស​ជប៉ុន សហរដ្ឋអាមេរិក សហភាព​អឺរ៉ុប ចក្រភព​អង់គ្លេស និង​កាណាដាសម្រាប់​ជំនួយ​ផ្នែក​យោធា និង​ជំនួយ​មនុស្សធម៌បន្ថែមទៀត​។ ​ប៉ុន្តែ​ការទាមទារ​របស់លោក​សម្រាប់​អង្គការ NATO ឱ្យ​អនុវត្ត​តំបន់​គ្មាន​ការហោះហើរ​ដើម្បី​ការពារ ប្រជាជន​របស់លោក​ត្រូវបាន​ច្រានចោល ដែល​បានបញ្ជាក់​យ៉ាងច្បាស់​ថា NATO នឹងមិន​ប្រថុយទៅនឹង​សង្គ្រាម​ជាមួយ​រុស្ស៊ី​ឡើយ​។​

​ទន្ទឹមនឹង​នេះដែរ ប្រធានាធិបតី​អ៊ុយ​ក្រែ​ន​លោក Volodymyr Zelenskyy កាលពី​ថ្ងៃ​ពុធបាន​ជំរុញឱ្យ​ប្រជាជន​ជុំវិញ​ពិភព​លោក ​បង្ហាញ​ការគាំទ្រ​សម្រាប់​អ៊ុយ​ក្រែ​នដោយ​ការប្រមូលផ្តុំ​ នៅតាម​ទីក្រុងរបស់​ពួកគេ​។ ​លោក Zelenskyy បានអំពាវ​នាវ​ឱ្យ​ប្រជាជនមកជា​មួយ​និមិត្តរូប​អ៊ុយ​ក្រែ​ន ហើយ​ប្រមូល​ផ្តុំគ្នាដើម្បី​សេរីភាព និង​សន្តិភាពចាប់​ពីថ្ងៃ​ព្រហស្បតិ៍នេះ​ទៅ ដែលមាន​រយៈពេល​មួយខែ​បន្ទាប់ពី​រុស្ស៊ីវាយលុក​ចូល​អ៊ុយ​ក្រែ​ន​៕

អត្ថបទ៖ ប៊ុនថន