អ្នកនាំពាក្យរាជរដ្ឋាភិបាលកម្ពុជា បានបញ្ជាក់ជាថ្មីថា ក្នុងជំនួបរវាងថ្នាក់ដឹកនាំកម្ពុជា ជាពិសេសសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីជាមួយបណ្ដាដៃគូសន្ទនាអន្តរជាតិនានា មិនថានៅក្នុងប្រទេស ឬក្រៅប្រទេស បញ្ហាព្រំដែនជាមួយថៃគឺជាប្រធានបទដែលថ្នាក់ដឹកនាំកម្ពុជាតែងតែលើកឡើងមិនអាចរំលងបានឡើយ ខណៈមិត្តអន្តរជាតិទាំងឡាយសុទ្ធតែបានដឹងការពិត ឬបានឃើញផ្ទាល់ភ្នែកពីសកម្មភាពឈ្លានពានរបស់ថៃមកលើកម្ពុជា។

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានថ្លែងតាមរយៈសន្និសីទសារព័ត៌មាននៅថ្ងៃទី៥ ខែមីនា ឆ្នាំ២០២៦នេះថា សម្តេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់រួចហើយថា ការការពារបូរណភាពទឹកដី និងប្រជាពលរដ្ឋ គឺជាអាទិភាពចម្បងខ្ពស់បំផុតរបស់រាជរដ្ឋាភិបាល។ នេះមិនមែនគ្រាន់តែជាពាក្យសម្តីទេ ប៉ុន្តែគឺជាការប្តេជ្ញាចិត្តយ៉ាងច្បាស់លាស់របស់រាជរដ្ឋាភិបាល និងបានស្តែងចេញជាសកម្មភាពជាក់ស្តែងរហូតមក។

ឯកឧត្តមថ្លែងថា មិនថានៅក្នុងប្រទេស ឬក្រៅប្រទេស មិនថាជំនួបពិភាក្សា ឬវេទិកាប្រជុំនានាទេ បញ្ហាព្រំដែនជាមួយថៃគឺជាប្រធានបទដែលមិនអាចរំលងបានឡើយ។ ចំណែកដៃគូសន្ទនាអន្តរជាតិទាំងឡាយសុទ្ធតែបានដឹងការពិតឬបានឃើញផ្ទាល់ភ្នែកពីសកម្មភាពបំពានកាន់កាប់ខុសច្បាប់របស់កងកម្លាំងថៃ ហើយបាននិងកំពុងជំរុញឱ្យមានដំណោះស្រាយដោយសន្តិវិធី ស្របតាមច្បាប់អន្តរជាតិ ដូចដែលកម្ពុជាចង់បាន។

អ្នកនាំពាក្យរាជរដ្ឋាភិបាលបញ្ជាក់ថា វត្តមានរបស់អង្គទូត តំណាងអង្គការអន្តរជាតិ មន្ត្រីអនុព័ន្ធយោធាបរទេស និងក្រុមអ្នកសង្កេតការណ៍អាស៊ាន (AOT) ក៏ដូចជាអ្នកសារព័ត៌មានជាតិ និងអន្តរជាតិ ចុះទៅពិនិត្យ ផ្ទៀងផ្ទាត់ និងរាយការណ៍ ជាបន្តបន្ទាប់ពីស្ថានភាពជាក់ស្តែងនៅតាមទីតាំងដែលថៃបានបំពាន ទន្ទ្រានកាន់កាប់ខុសច្បាប់ បង្ហាញឱ្យឃើញពីសកម្មភាពការទូតយ៉ាងសកម្មរបស់រាជរដ្ឋាភិបាលក្នុងការការពារបូរណភាពទឹកដី និងប្រជាពលរដ្ឋខ្មែរដែលរងការបំពានដោយភាគីថៃ។ កម្ពុជាក៏បានបង្ហាញជំហរច្បាស់លាស់ដោយឈរលើដំណោះស្រាយសន្តិវិធី៕ អត្ថបទ៖ ដារ៉ា