រដ្ឋមន្ត្រីក្រសួងថាមពលរបស់សហរដ្ឋអាមេរិក លោក Chris Wright ប្រាប់ទៅកាន់សារព័ត៌មាន Fox News កាលពីថ្ងៃពុធ (៤ មីនា) ថា ផលប៉ះពាល់នៃជម្លោះអ៊ីរ៉ង់ ទៅលើទីផ្សារថាមពលសកល នឹងកើតឡើងក្នុងរយៈពេលខ្លី ហើយថា នេះគឺជា «តម្លៃដ៏តបស្នងតូចតាចប៉ុណ្ណោះ» ដើម្បីដោះដូរនឹងគោលដៅដ៏ធំរបស់យោធាសហរដ្ឋអាមេរិក។

ការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែល ទៅលើប្រទេសអ៊ីរ៉ង់ និងការឆ្លើយតបជាបន្តបន្ទាប់ពីទីក្រុងតេអេរ៉ង់ បានធ្វើឱ្យភាពតានតឹងក្នុងតំបន់កាន់តែរីកធំឡើង និងបានធ្វើឱ្យការដឹកជញ្ជូនតាមច្រកសមុទ្រ Hormuz ត្រូវជាប់គាំង ដែលរំខានដល់លំហូរប្រេង និងឧស្ម័នដ៏សំខាន់របស់មជ្ឈិមបូព៌ា និងធ្វើឱ្យតម្លៃថាមពលសកល ហក់ឡើងខ្ពស់។

នៅថ្ងៃព្រហស្បតិ៍ ទី៥ ខែមីនា នេះ តម្លៃប្រេងបានកើនឡើងយ៉ាងគំហុកនៅក្នុងតំបន់អាស៊ី ស្របពេលមានការព្រួយបារម្ភកាន់តែខ្លាំងឡើង ជុំវិញការបិទច្រកសមុទ្រ Hormuz អស់រយៈពេលយ៉ាងយូរ។ លោក Wright បានប្រាប់កម្មវិធីមួយរបស់ទូរទស្សន៍ Fox News ថា៖ «បញ្ហានេះច្បាស់ជានឹងមានលក្ខណៈបណ្តោះអាសន្នប៉ុណ្ណោះ»។

ប្រធានាធិបតីអាមេរិក លោក Donald Trump សន្យាថានឹងផ្តល់ការធានារ៉ាប់រង និងមាននាវាជើងទឹកអមដំណើរសម្រាប់នាវាដែលនាំចេញថាមពលពីតំបន់នោះ ដើម្បីទប់ការឡើងថ្លៃយ៉ាងគំហុក។ លោក Wright បានបញ្ជាក់ថា ការបិទច្រកសមុទ្រ Hormuz គឺជាព្រឹត្តិការណ៍បណ្តោះអាសន្នប៉ុណ្ណោះ ហើយកងទ័ពជើងទឹកអាមេរិក នឹងចាប់ផ្តើមអមដំណើរនាវាដឹកប្រេងតាមផ្លូវទឹកនេះ ក្នុងពេលឆាប់ៗ ដែលជាផ្លូវទឹកដឹកជញ្ជូនប្រេងប្រមាណ ១ភាគ៥ នៃបរិមាណប្រើប្រាស់សរុបប្រចាំថ្ងៃរបស់ពិភពលោក៕