សកម្មភាពកងទ័ពអាកាសរបស់ប្រទេសចិន នៅជុំវិញកោះតៃវ៉ាន់ បានធ្លាក់ចុះយ៉ាងខ្លាំងក្នុងរយៈពេលប៉ុន្មានសប្តាហ៍ថ្មីៗនេះ ដោយក្នុងនោះ ពុំមានការហោះហើរទាល់តែសោះក្នុងសប្តាហ៍កន្លងទៅ។ ការធ្លាក់ចុះភ្លាមៗនៃសមយុទ្ធយោធា ដែលធ្លាប់តែធ្វើឡើងជារៀងរាល់ថ្ងៃនេះ អាចជាសញ្ញាបង្ហាញថា ទីក្រុងប៉េកាំង កំពុងកែសម្រួលយុទ្ធសាស្ត្រដាក់សម្ពាធរបស់ខ្លួនលើកោះតៃវ៉ាន់។

យោងតាមទិន្នន័យរបស់អាជ្ញាធរកោះតៃវ៉ាន់ ដែលចងក្រងដោយក្រុមស្រាវជ្រាវ STA បានឱ្យដឹងថា ប្រទេសចិន បានបញ្ជូនយន្តហោះយោធាចំនួន ៤៦០ គ្រឿង រាប់ចាប់ពីយន្តហោះចម្បាំងរហូតដល់យានដ្រូន ចូលទៅក្នុងតំបន់កំណត់អត្តសញ្ញាណការពារអាកាសរបស់តៃវ៉ាន់ (ADIZ) រហូតមកដល់ពេលនេះនៅក្នុងឆ្នាំ ២០២៦ នេះ ដែលតួលេខនេះមានការធ្លាក់ចុះដល់ទៅ ៤៦,៥% បើធៀបនឹងឆ្នាំមុន។

កាលពីខែកុម្ភៈកន្លងទៅ កោះតៃវ៉ាន់ បានពិនិត្យឃើញយន្តហោះយោធាចិនចំនួន ១៩០ គ្រឿង ដែលជាចំនួនប្រចាំខែទាបបំផុត ចាប់តាំងពីអាជ្ញាធរការពារជាតិរបស់កោះនេះ បានចាប់ផ្តើមផ្សព្វផ្សាយទិន្នន័យលម្អិតប្រចាំថ្ងៃក្នុងឆ្នាំ ២០២២ មក។ មន្ត្រីកោះតៃវ៉ាន់ពីររូបបានលើកឡើងថា លោកប្រធានាធិបតីចិន Xi Jinping ប្រហែលជាកំពុងកាត់បន្ថយយុទ្ធសាស្ត្រសម្ពាធដែលមើលឃើញច្បាស់ ដើម្បីបង្កើតបរិយាកាសល្អប្រសើរ មុនជំនួបដែលត្រូវបានរំពឹងទុកយ៉ាងទូលំទូលាយជាមួយប្រធានាធិបតីអាមេរិក លោក Donald Trump នៅចុងខែមីនា នេះ។

យោងតាមអ្នកស្រាវជ្រាវនៅវិទ្យាស្ថាន STA បានឱ្យដឹងថា ប្រទេសចិន ដែលចាត់ទុកកោះនេះជាទឹកដីរបស់ខ្លួន មិនបានបញ្ជូនយន្តហោះយោធាណាមួយទៅជិតកោះតៃវ៉ាន់ឡើយ ចាប់តាំងពីថ្ងៃទី ២៧ ខែកុម្ភៈ មក ដែលនេះជាការផ្អាកប្រតិបត្តិការរយៈពេល ៦ ថ្ងៃមិនធ្លាប់មានពីមុនមក ហើយបានកើតឡើងស្របពេលជាមួយនឹងសង្គ្រាមនៅប្រទេសអ៊ីរ៉ង់៕