ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃពុធថា ទីក្រុងមូស្គូ អាចបញ្ឈប់ការផ្គត់ផ្គង់ឧស្ម័នទៅអឺរ៉ុប «នៅពេលនេះ»។

ការព្រមាន បានធ្វើឡើងក្នុងពេលមានការកើនឡើងតម្លៃថាមពលដែលបង្កឡើងដោយវិបត្តិប្រទេសអ៊ីរ៉ង់។ លោក Putin បានធ្វើអត្ថាធិប្បាយបែបនេះនៅពេលត្រូវបានសួរអំពីផែនការរបស់អឺរ៉ុបក្នុងការដាក់បម្រាមនាំចូលឧស្ម័នរបស់រុស្ស៊ី។

ទោះជាយ៉ាងណា អឺរ៉ុបបាននិយាយថា ពួកគេមានគម្រោងរឹតត្បិតលើការទិញឧស្ម័នរបស់រុស្ស៊ី ហើយមានផែនការធ្វើវាក្នុងរយៈពេលមួយខែ ដោយថ្ងៃទី២៤ ខាងមុខនេះជាថ្ងៃចុងក្រោយ ហើយចាប់ផ្តើមពីថ្ងៃទី២៥ ពួកគេនឹងរឹតត្បិតលើឧស្ម័ន រួមទាំងឧស្ម័នរាវ ផងដែរ។ នៅឆ្នាំ ២០២៧ ពួកគេនឹងដាក់ការរឹតត្បិតបន្ថែមទៀតរហូតដល់មានការហាមឃាត់ទាំងស្រុង។

ប្រទេសរុស្ស៊ី មានឧស្ម័នធម្មជាតិបម្រុងច្រើនបំផុតរបស់ពិភពលោក និងជាប្រទេសនាំចេញប្រេងធំបំផុតទីពីររបស់ពិភពលោក។ ប៉ុន្តែទីក្រុងមូស្គូ បានបាត់បង់ទីផ្សារនៅអឺរ៉ុបដែលរកប្រាក់ចំណេញបានច្រើនរបស់ខ្លួន បន្ទាប់ពីតំបន់នេះបានស្វែងរកការកាត់បន្ថយការពឹងផ្អែកលើថាមពលរបស់រុស្ស៊ី ដោយសារតែការឈ្លានពាននៅអ៊ុយក្រែន។ លោកPutin និយាយថា តម្លៃប្រេងកំពុងកើនឡើងដោយសារតែ «ការឈ្លានពានប្រឆាំងនឹងអ៊ីរ៉ង់» និងការរឹតបន្តឹងរបស់លោកខាងលិចលើប្រេងរបស់រុស្ស៊ី។