មេដឹកនាំក្រុមលីបង់ដែលគាំទ្រដោយអ៊ីរ៉ង់ លោក Naim Qassem បាននិយាយនៅក្នុងសុន្ទរកថាតាមទូរទស្សន៍ កាលពីយប់ថ្ងៃពុធថា ក្រុមហេសបូឡា នឹងប្រឆាំង«ការឈ្លានពានរបស់អ៊ីស្រាអែល និងសហរដ្ឋអាមេរិក» ហើយនឹងមិនចុះចាញ់ឡើយ ទោះបីជាសមត្ថភាព មិនមានតុល្យភាពក៏ដោយ។

មេដឹកនាំក្រុមហេសបូឡារូបនេះ បានប្រកាសនៅក្នុងសុន្ទរកថាដំបូងរបស់លោក ចាប់តាំងពីក្រុមរបស់លោក បានបាញ់រ៉ូកែតឆ្ពោះទៅកាន់អ៊ីស្រាអែលកាលពីថ្ងៃចន្ទ ហើយអ៊ីស្រាអែល បានចាប់ផ្តើមយុទ្ធនាការទម្លាក់គ្រាប់បែកនៅលីបង់ថា៖«យើងកំពុងប្រឈមនឹងការឈ្លានពាន...ជម្រើសរបស់យើង គឺត្រូវទប់ទល់ វារហូតដល់ដំណាក់កាលចុងក្រោយ ហើយយើងនឹងមិនចុះចាញ់ឡើយ»។

លោក Qassem បានបដិសេធគំនិតដែលថា ក្រុមរបស់លោក បានចាប់ផ្តើមការប្រយុទ្ធជុំបច្ចុប្បន្ន ដោយនិយាយថា៖«អ្វីដែលអ៊ីស្រាអែលបានធ្វើ បន្ទាប់ពីការបាញ់រ៉ូកែតនោះ គឺមែនជាការឆ្លើយតបទេ។ វាគឺជាការឈ្លានពានដែលត្រូវបានរៀបចំទុកជាមុន»។

«ក្រុមហេសបូឡា និងក្រុមតស៊ូឥស្លាមរបស់ខ្លួន កំពុងឆ្លើយតបទៅនឹងការឈ្លានពានរបស់អ៊ីស្រាអែល និងអាមេរិក ហើយនេះ គឺជាសិទ្ធិស្របច្បាប់...សម្រាប់យើង នេះគឺជាការការពារអត្ថិភាព»។

សង្គ្រាមមជ្ឈិមបូព៌ា បានពង្រីកដល់លីបង់កាលពីថ្ងៃចន្ទ ហើយក្រោយមកអ៊ីស្រាអែល បាននិយាយថា កងទ័ពរបស់ខ្លួន បានចូលទៅក្នុងទីក្រុង និងភូមិមួយចំនួន នៅខាងត្បូងលីបង់។

អាជ្ញាធរលីបង់បាននិយាយកាលពីថ្ងៃពុធថា យុទ្ធនាការរបស់អ៊ីស្រាអែល បានសម្លាប់មនុស្សយ៉ាងហោចណាស់ ៧២នាក់ និងបានធ្វើឲ្យមនុស្សជាង ៨៣.០០០នាក់ ផ្លាស់ទីលំនៅ៕