នៅថ្ងៃព្រហស្បតិ៍ (ទី៥ ខែមីនា ឆ្នាំ២០២៦) នេះ ទិន្នន័យរបស់ក្រសួងពាណិជ្ជកម្មថៃ បានបង្ហាញថា សន្ទស្សន៍តម្លៃទំនិញប្រើប្រាស់ បានធ្លាក់ចុះ ០,៨៨ភាគរយ ក្នុងខែកុម្ភៈ ដោយនេះជាការមានអត្រាអវិជ្ជមានរយៈពេល ១១ខែជាប់ៗគ្នា។ ធៀបនឹងខែមុន សន្ទស្សន៍នេះបានធ្លាក់ចុះ ០,២៤ភាគរយ។

តួលេខទាំង ២ នេះ គឺខ្សោយជាងការប៉ាន់ស្មានមធ្យម នៅក្នុងការស្ទង់មតិរបស់សារព័ត៌មាន Bloomberg លើសេដ្ឋវិទូ។ អតិផរណាស្នូល បានកើនឡើង ០,៥៦ភាគរយ ស្របតាមការរំពឹងទុករបស់អ្នកសេដ្ឋកិច្ច។

ភាពតានតឹង នៅតំបន់មជ្ឈិមបូព៌ា គំរាមកំហែងដល់ការឡើងតម្លៃប្រេងសកល និងជំរុញអតិផរណា នៅក្នុងសេដ្ឋកិច្ចជាច្រើនលើសពីគោលដៅ។ ហើយក្នុងសន្និសីទសារព័ត៌មានមួយ នាថ្ងៃព្រហស្បតិ៍ ក្រសួងពាណិជ្ជកម្មបានលើកឡើងថា អតិផរណារបស់ថៃ ត្រូវបានគេរំពឹងថា នឹងកើនឡើងនៅក្នុងខែមីនាដោយសារតែតម្លៃប្រេងឡើងខ្ពស់។

អគ្គនាយកការិយាល័យគោលនយោបាយ និងយុទ្ធសាស្ត្រពាណិជ្ជកម្មរបស់ក្រសួងពាណិជ្ជកម្ម លោក Nantapong Chiralerspong បាននិយាយថា វាពិបាកក្នុងការវាយតម្លៃទស្សនវិស័យអតិផរណា ព្រោះវាអាស្រ័យទៅលើទំហំ និងរយៈពេលនៃជម្លោះ។ លោកបានបញ្ជាក់ថា ប្រសិនបើតម្លៃប្រេងសកលនៅតែស្ថិតក្នុងចន្លោះពី ៨០ដុល្លារ ទៅ ១២០ដុល្លារ ក្នុងមួយបារ៉ែល អតិផរណានៅឆ្នាំនេះ អាចកើនឡើងពី ១ភាគរយ ទៅ ៣ភាគរយ។

បើយោងតាមសារព័តមាន Bloomberg Economics បានប៉ាន់ប្រមាណថា តម្លៃទំនិញប្រើប្រាស់ជាមធ្យម នឹងកើនឡើងដល់ ០,៨ភាគរយ នៅឆ្នាំនេះ៕