នាយិកាគ្រប់គ្រងមូលនិធិរូបិយវត្ថុអន្តរជាតិ (IMF) លោកស្រី Kristalina Georgieva បាននិយាយថា សង្គ្រាមនៅតំបន់មជ្ឈិមបូព៌ា នឹងសាកល្បងភាពធន់នៃសេដ្ឋកិច្ចពិភពលោក ហើយបានព្រមានថា «ការរំខានភ្លាមៗ ក្នុងរូបភាព និងទំហំផ្សេងគ្នា» នឹងបន្តកើតមានឡើង។

ដោយគូសបញ្ជាក់ពីក្តីបារម្ភរបស់ IMF ចំពោះទុក្ខវេទនា និងការបាត់បង់ជីវិតដែលបណ្តាលមកពីវិបត្តិនៅតំបន់មជ្ឈិមបូព៌ា លោកស្រី Georgieva បានព្រមានថា ជម្លោះអូសបន្លាយ អាចប៉ះពាល់ដល់តម្លៃថាមពល ទស្សនៈទីផ្សារ កំណើនសេដ្ឋកិច្ច និងអតិផរណា ដោយ «បន្ថែមបន្ទុកថ្មីលើអ្នកធ្វើគោលនយោបាយគ្រប់ទីកន្លែង»។

អំឡុងស្ថិតនៅតំបន់អាស៊ី ក្នុងសន្និសីទឆ្នាំ២០៥០ ក្នុងទីក្រុងបាងកក លោកស្រី Georgieva បានលើកឡើង ថា៖ «យើងស្ថិតនៅក្នុងពិភពលោកដែលមានការរំខានញឹកញាប់ជាងមុន និងប៉ាន់ស្មានមិនបានជាងមុន។ ភាគច្រើន យើងមិនអាចទស្សន៍ទាយថា វានឹងទៅជាយ៉ាងណានោះទេ។ ប៉ុន្តែគ្រប់ពេលវេលា យើងអាចប្រឹងប្រែងត្រៀមខ្លួន សម្រាប់ហេតុការណ៍ទាំងនោះ»។

គួរបញ្ជាក់ថា ការសងសឹករបស់អ៊ីរ៉ង់ ចំពោះការវាយប្រហាររបស់សហរដ្ឋអាមេរិក-អ៊ីស្រាអែល បានរំខានដល់ការធ្វើដំណើរ និងលំហូរប្រេងឆ្លងកាត់ច្រកសមុទ្រ Hormuz រួចហើយ ហើយសេណារីយ៉ូសេដ្ឋកិច្ចរបស់សារព័ត៌មាន Bloomberg បង្ហាញថា តម្លៃថាមពលកើនឡើងអាចជំរុញអតិផរណា និងបំផ្លាញកំណើនសេដ្ឋកិច្ចពិភពលោក៕