គ្រួសារអាហ្វហ្គានីស្ថាន ជម្លៀសខ្លួនដោយសារការវាយប្រហារតាមច្រកអាកាសរបស់ប៉ាគីស្ថាននៅខេត្ត Nangarhar ជិតព្រំដែនជាមួយប៉ាគីស្ថាន កំពុងរស់នៅក្នុងសំពត់តង់ ក្រោយផ្ទះសម្បែងរបស់ពួកគេ រងការបំផ្លិចបំផ្លាញ នៅក្នុងជម្លោះឆ្លងព្រំដែន ។

 លោក Wazirestan Shinwaray គឺជាបុរសជម្លៀសខ្លួនមួយរូបនៅជំរំ Lal Pur និយាយថា នៅយប់ថ្ងៃព្រហស្បិត៍ ក្រោយពិធីបួងសួង Taraweeh ទុក្ខវេទនានេះ ក៏បានចាប់ផ្តើម ។ មនុស្សត្រូវបានជម្លៀសខ្លួន អ្នកខ្លះមកទីនេះ មកកាន់ជំរំ Lal Pur ហើយអ្នកខ្លះទៀត ទៅផ្ទះសាច់ញាតិរបស់ពួកគេ ។

 លោក Hazrat Meer គឺជាបុរសជម្លៀសខ្លួនម្នាក់ទៀត និយាយដែរថា ការទម្លាក់គ្រាប់បែកបន្តពេញមួយយប់ ។ មិនថាក្មេងៗ ឬពួកយើងទេ សុទ្ធតែមិនអាចដេកពួនបានដូចគ្នា ។

 ភាពតានតឹងបានឆាបឆេះឡើងរវាងប៉ាគីស្ថាន និងអាហ្វហ្គានីស្ថាន ស្របពេលការវាយប្រហារតាមច្រកអាកាសរបស់ទីក្រុងអ៊ីស្លាម៉ាបាដ លើទីក្រុងសំខាន់ៗរបស់អាហ្វហ្គានីស្ថាន ធ្វើឲ្យទំនាក់ទំនងជាប់គាំងអស់រយៈពេលជាច្រើនឆ្នាំ កាន់តែអាក្រក់ខ្លាំង ។

 រដ្ឋាភិបាលប៉ាគីស្ថានអះអាងថា ការវាយប្រហារមួយចំនួនដែលមានគោលដៅលើតំបន់គ្រប់គ្រងរបស់ក្រុមតាលីបង់ មានគោលបំណងរុះរើក្រុមជីវពលដែលបើកការវាយប្រហារចេញពីទឹកដីអាហ្វហ្គានីស្ថាន ។ រដ្ឋបាលតាលីបង់របស់អាហ្វហ្គានីស្ថាន ច្រានចោលថា ពួកគេពុំបានផ្តល់កន្លែងជ្រកកោនដល់ក្រុមទាំងនេះទេ ។

 ការកើតមានជម្លោះនេះដែរ បន្ថែមពីលើអស្ថិរភាពកើនឡើងក្នុងតំបន់ ដែលកើតឡើងដំណាលគ្នានឹងភាពតានតឹងខ្លាំង បន្ទាប់សកម្មភាពយោធាសហរដ្ឋអាមេរិក និងអ៊ីស្រាអែល លើអ៊ីរ៉ង់ ៕