រដ្ឋមន្ត្រីការបរទេសមកពីក្រុមប្រឹក្សាសហប្រតិបត្តិការឈូងសមុទ្រ (GCC) និងសហភាពអឺរ៉ុប (EU) គ្រោងនឹងបើកកិច្ចប្រជុំរដ្ឋមន្ត្រីបន្ទាន់មួយ នៅថ្ងៃព្រហស្បតិ៍នេះ ដើម្បីពិភាក្សាអំពីផលវិបាកនៃការវាយប្រហាររបស់អ៊ីរ៉ង់ទៅលើរដ្ឋ GCC និងការវិវត្តក្នុងតំបន់កាន់តែធំឡើង។

លោក Jasem Mohamed Albudaiwi អគ្គលេខាធិការ GCC បាននិយាយថា កិច្ចប្រជុំនេះ នឹងប្រមូលផ្តុំរដ្ឋមន្ត្រីការបរទេសមកពី GCC និងរដ្ឋជាសមាជិក EU។

លោកស្រី Kaja Kallas តំណាងជាន់ខ្ពស់របស់សហភាពអឺរ៉ុបទទួលបន្ទុកគោលនយោបាយការបរទេស និងសន្តិសុខ និងជាអនុប្រធានគណៈកម្មការអឺរ៉ុប ក៏នឹងចូលរួមតាមរយៈសន្និសីទតាមវីដេអូផងដែរ។

លោក Albudaiwi បាននិយាយថា កិច្ចពិភាក្សានឹងដោះស្រាយផលវិបាកនៃអ្វីដែលលោក បានពិពណ៌នាថា ជាការឈ្លានពានរបស់អ៊ីរ៉ង់ប្រឆាំងនឹងរដ្ឋ GCC និងផលប៉ះពាល់កាន់តែទូលំទូលាយរបស់វា ទៅលើសន្តិសុខក្នុងតំបន់ និងពិភពលោក។

លោកបានបន្ថែមថា តាមរយៈការសម្របសម្រួលជាមួយដៃគូក្នុងតំបន់ និងអន្តរជាតិ GCC មានគោលបំណងថ្កោលទោសចំពោះការវាយប្រហារដែលកំណត់គោលដៅលើជនស៊ីវិល ហេដ្ឋារចនាសម្ព័ន្ធ និងអគារការទូត នៅក្នុងរដ្ឋជាសមាជិក៕