រដ្ឋាភិបាលប្រទេសកូរ៉េខាងត្បូងនៅថ្ងៃព្រហស្បតិ៍នេះ បានចេញការព្រមានប្រុងប្រយ័ត្នជាមុនក្រោមប្រព័ន្ធត្រួតពិនិត្យសន្តិសុខធនធានរបស់ខ្លួន ដោយលើកឡើងពីការព្រួយបារម្ភថាភាពតានតឹងកាន់តែខ្លាំងឡើងនៅមជ្ឈិមបូព៌ា អាចធ្វើឲ្យរំខានដល់ការផ្គត់ផ្គង់ថាមពលពិភពលោក។

ក្រសួងពាណិជ្ជកម្ម ឧស្សាហកម្ម និងធនធានបានចេញការព្រមានកម្រិត «ព្រួយបារម្ភ» សម្រាប់ប្រេងឆៅ និងឧស្ម័ន ដោយនិយាយថា ចំណាត់ការនេះគឺជាជំហានប្រុងប្រយ័ត្នជាមុនក្នុងគោលបំណងពង្រឹងការត្រួតពិនិត្យ និងការត្រៀមខ្លួនជាមុន ជាពិសេសខណៈកូរ៉េខាងត្បូងពឹងផ្អែកយ៉ាងខ្លាំងទៅលើប្រេង និងឧស្ម័ននាំចូលពីមជ្ឈិមបូព៌ា។

មន្ត្រីបាននិយាយថា ពុំមានការរំខានភ្លាមៗចំពោះការនាំចូលថាមពលនោះទេ ប៉ុន្តែរដ្ឋាភិបាលនឹងតាមដានយ៉ាងដិតដល់នូវការវិវត្តនៅក្នុងតំបន់ និងសម្របសម្រួលជាមួយភ្នាក់ងារ និងក្រុមហ៊ុនពាក់ព័ន្ធ។ ក្រសួងបាននិយាយថា ការព្រមាននេះមានបំណងអាចឱ្យមានការឆ្លើយតបបានឆាប់រហ័ស ប្រសិនបើអស្ថិរភាពនៅមជ្ឈិមបូព៌ា ប៉ះពាល់ដល់ផ្លូវដឹកជញ្ជូន ឬទីផ្សារថាមពល។