នាយករដ្ឋមន្ត្រីកាណាដា លោក Mark Carney បាននិយាយនៅថ្ងៃព្រហស្បតិ៍ (ទី៥ ខែមីនា ឆ្នាំ២០២៦) នេះថា លោកមិនអាចច្រានចោលការចូលរួមផ្នែកយោធារបស់ប្រទេសលោក នៅក្នុងសង្គ្រាមដែលកំពុងកើនឡើងនៅតំបន់មជ្ឈិមបូព៌ានោះឡើយ។

ដំណើរទស្សនកិច្ចរបស់លោក Carney ទៅកាន់ប្រទេសអូស្ត្រាលីក្នុងសប្តាហ៍នេះ ត្រូវបានគ្របដណ្ដប់ដោយសង្គ្រាមដែលកំពុងរីលរាលដាល នៅតំបន់មជ្ឈិមបូព៌ា ដែលបង្កឡើងដោយការវាយប្រហារដ៏ធំលើអ៊ីរ៉ង់ ពីសំណាក់សហរដ្ឋអាមេរិក និងអ៊ីស្រាអែល ដែលបានសម្លាប់មេដឹកនាំកំពូលរបស់ប្រទេសនេះ គឺលោក Ayatollah Ali Khamenei។

អំឡុងពេលថ្លែងជាមួយសមភាគី លោក Anthony Albanese នៅទីក្រុង Canberra លោក Carney ត្រូវបានគេសួរថា តើមានស្ថានភាពដែលកាណាដានឹងពាក់ព័ន្ធដែរ ឬទេ។ លោកបានឆ្លើយថា «គ្មាននរណាម្នាក់អាចច្រានចោលការពាក់ព័ន្ធដោយដាច់ខាតបានឡើយ» ខណៈពេលដែលសង្កត់ធ្ងន់ថា សំណួរនេះ គឺជា «ពាក្យសន្មតិ»។

លោក Carney បាបន្តថា «យើងនឹងគាំទ្រសម្ព័ន្ធមិត្តរបស់យើង» ដោយបន្ថែមថា «យើងនឹងតែងតែការពារជនជាតិកាណាដាជានិច្ច»។ លោក Carney បានបញ្ជាក់ថា ការវាយប្រហារដោយសហរដ្ឋអាមេរិក និងអ៊ីស្រាអែលលើអ៊ីរ៉ង់ គឺ «មិនស្របតាមច្បាប់អន្តរជាតិឡើយ»។

តែយ៉ាងណាក្ដី លោកគាំទ្រកិច្ចប្រឹងប្រែង ដើម្បីទប់ស្កាត់អ៊ីរ៉ង់កុំឲ្យទទួលបានអាវុធនុយក្លេអ៊ែរ ពោលគឺជាគោលជំហរដែលកាណាដាប្រកាន់យក «អមដោយការសោកស្តាយ» ព្រោះជម្លោះនេះតំណាង «ឧទាហរណ៍មួយទៀតនៃការបរាជ័យរបស់សណ្តាប់ធ្នាប់អន្តរជាតិ»។ មេដឹកនាំកាណាដាបានបញ្ជាក់ជាថ្មីនៅថ្ងៃទី៥ ខែមីនានេះនូវការអំពាវនាវរបស់លោក ដើម្បីឲ្យមាន «ការបន្ធូរបន្ថយជម្លោះ»៕