រដ្ឋមន្រ្តីការបរទេសឥណ្ឌូនេស៊ីនិយាយថា ការពិភាក្សាពីក្រុមប្រឹក្សាសន្តិភាពរបស់ប្រធានាធិបតីសហរដ្ឋអាមេរិកលោក Donald Trump ដែលប្រទេសនៅអាស៊ីអាគ្នេយ៍មួយនេះ គឺជាសមាជិករួមចំណែកទាហានដ៏សំខាន់មួយនោះ ត្រូវផ្អាកបណ្តោះអាសន្ន ដោយសារសង្រ្គាមនៅមជ្ឈិមបូព៌ា ។

ក្រុមប្រឹក្សាសន្តិភាព ត្រូវបានបង្កើតដំបូង ដើម្បីធានាថា ការសាងសង់ឡើងវិញក្រោយជម្លោនៅតំបន់ហ្កាហ្សា ដំណើរការទៅដោយប្រសិទ្ធិភាព ។

សង្រ្គាមតាមច្រកអាកាសរបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ បានសម្លាប់ជនស៊ីវិលជាច្រើន ធ្វើឲ្យការដឹកជញ្ជូនតាមផ្លូវអាកាស ធ្លាក់ក្នុងភាពវឹកវរ និងធ្វើឲ្យតម្លៃប្រេងហក់ឡើងខ្ពស់ ក្រោយការបិទច្រកសមុទ្រ Hormuz ដោយប្រសិទ្ធិភាព ។

នៅពេលសួរពីការអំពាវនាវឲ្យឥណ្ឌូនេស៊ីចាកចេញពីក្រុមប្រឹក្សាសន្តិភាព ក្រោយជម្លោះថ្មីនៅមជ្ឈិមបូព៌ា លោករដ្ឋមន្រ្តីការបរទេស Sugiono និយាយថា ការពិភាក្សាទាំងអស់ពីក្រុមប្រឹក្សាសន្តិភាព ត្រូវផ្អាក ស្របពេលចំណាប់អារម្មណ៍ទាំងអស់ងាកទៅរកស្ថានភាពនៅប្រទេសអ៊ីរ៉ង់ ។

លោក Sugiono និយាយប្រាប់ក្រុមអ្នកសារព័ត៌មានក្រោយចូលរួមព្រឹត្តការណ៍ជាមួយលោកប្រធានាធិបតី Prabowo Subiantoថា ពួកយើងនឹងពិគ្រោះយោបល់ផងដែរជាមួយមិត្ត និងសហការីរបស់ពួកយើងនៅតំបន់ឈូងសមុទ្រអារ៉ាប់ ពីព្រោះថា ពួកគេក៏ស្ថិតក្រោមការវាយប្រហារផងដែរ ។

សូមបញ្ជាក់ថា ការចូលរួមក្រុមប្រឹក្សាសន្តិភាពរបស់ឥណ្ឌូនេស៊ី បានរងការរិះគន់ច្រើនពីក្រុមអ្នកជំនាញ និងក្រុមមូស្លីមនៅក្នុងប្រទេសរបស់ពួកគេដែលនិយាយថា វាធ្វើឲ្យប៉ះពាល់ដល់ការគាំទ្រយូរអង្វែងរបស់ប្រទេសជនមូស្លីមច្រើនជាងគេបំផុតរបស់ពិភពលោកមួយនេះ ចំពោះបុព្វហេតុជនប៉ាឡេស្ទីន ៕