រដ្ឋមន្រ្តីព័ត៌មាននិយាយប្រាប់សភាថា នាវាចម្បាំងទី ២របស់អ៊ីរ៉ង់ កំពុងធ្វើដំណើរឆ្ពោះទៅកាន់ដែនទឹកស្រីលង្កានៅថ្ងៃព្រហស្បតិ៍នេះ រយៈពេល ១ថ្ងៃ ក្រោយនាវាមុជទឹកសហរដ្ឋអាមេរិក បានកម្ទេចនាវាពិឃាតអ៊ីរ៉ង់ ដោយបានសម្លាប់ទាហានជើងទឹកយ៉ាងហោច ៨៤នាក់ ។

រដ្ឋមន្រ្តីព័ត៌មានអ៊ីរ៉ង់លោក Nalinda Jayatissa និយាយថា នាវាចម្បាំងអ៊ីរ៉ង់ទី ២ នឹងស្ថិតនៅក្រៅដែនទឹកស្រីលង្កា ប៉ុន្តែលោកពុំបានផ្តល់រឿងរ៉ាវលម្អិតបន្ថែមនោះទេ ។

ប្រភពផ្លូវការបានឲ្យដឹងថា ប្រធានាធិបតីស្រីលង្កាលោក Anura Kumara Dissanayake មាននូវជំនួបជាមួយក្រុមមន្រ្តីជាន់ខ្ពស់របស់លោកនៅថ្ងៃព្រហស្បតិ៍នេះ ដើម្បីពិភាក្សាលើការឆ្លើយតបចំពោះសំណើរបស់អ៊ីរ៉ង់ ដើម្បីចូលដែនទឹកប្រទេសកោះមួយនេះ ដោយសុវត្ថិភាព ។ 

ពួកគេនិយាយថា នាវាមួយគ្រឿងនេះ ដឹកសមាជិកនាវិកជាង ១០០នាក់ ហើយពួកគេមានការព្រួយបារម្ភថា ពួកគេអាចនឹងក្លាយជាគោលដៅតាមផ្លូវតែមួយលើនាវាដែលត្រូវបានបាញ់ពន្លិចដោយនាវាមុជទឹកសហរដ្ឋអាមេរិកនៅជិតតំបន់ឆ្នេរភាគខាងត្បូងស្រីលង្កា កាលពីថ្ងៃពុធ ។

ការបាញ់ពន្លិចនាវាចម្បាំង IRIS Dena បានកើតមានឡើង ស្របពេលសង្រ្គាមបង្កឡើងដោយសារការវាយប្រហាររួមគ្នារបស់សហរដ្ឋអាមេរិក-អ៊ីស្រាអែល លើអ៊ីរ៉ង់ បន្តរីករាលដាលនៅទូទាំងតំបន់មជ្ឈិមបូព៌ា និងតំបន់ឯនាយផ្សេងទៀត ។

នៅថ្ងៃព្រហស្បតិ៍នេះ រដ្ឋមន្រ្តីការបរទេសអ៊ីរ៉ង់លោក Abbas Araghchi បានបរិហារការវាយប្រហាររបស់សហរដ្ឋអាមេរិក និងបានព្រមានទីក្រុងវ៉ាស៊ីនតោនថា ពួកគេនឹងសោកស្តាយជាទីបំផុតចំពោះទង្វើដែលពួកគេបានបង្កឡើង ។

លោកបានសរសេរនៅលើបណ្តាញព័ត៌មានសង្គម Xថា សហរដ្ឋអាមេរិក បានប្រព្រឹត្តអំពើឃោរឃៅនៅសមុទ្រចម្ងាយជាង ៣.២០០គ.ម ពីតំបន់ឆ្នេរអ៊ីរ៉ង់ ។ នាវា IRIS Dena ដែលជាភ្ញៀវរបស់កងទ័ពជើងទឹកឥណ្ឌាដឹកទាហានជើងទឹកជិត ១៣០នាក់នោះ ត្រូវបានវាយប្រហារនៅក្នុងដែនសមុទ្រអន្តរជាតិ ដោយគ្មានការព្រមានទុកជាមុននោះឡើយ ៕