ប្រធានក្រុមហេសបូឡាលោក Naim Qassem ដែលបានថ្លែងសុន្ទរកថាលើកញ្ចក់ទូរទស្សន៍ជាលើកដំបូងរបស់លោក ចាប់តាំងអរីភាពថ្មីៗនេះ ចាប់ផ្តើម និយាយថា ការវាយប្រហាររបស់អ៊ីស្រាអែលលើលីបង់ គឺជាការឈ្លានពានរៀបចំទុកជាមុន ហើយលោកបានអំពាវនាវឲ្យអ៊ីស្រាអែលបញ្ចប់សកម្មភាពយោធារបស់ខ្លួន និងដកទ័ពចេញពីតំបន់ភាគខាងត្បូងលីបង់ ។

លោកនិយាយថា ពួកយើងនឹងមិនចុះចាញ់ជាដាច់ខាត មិនសំខាន់ត្រូវពលីជីវិតបែបណានោះទេ ហើយការឆ្លើយតបរបស់ក្រុមហេសបូឡា មិនពាក់ព័ន្ធនឹងសង្រ្គាមណាមួយនោះទេ ។

ក្រុមហេសបូឡា បានបើកការវាយប្រហារយានដ្រូន និងគ្រាប់រ៉ុក្កែតលើអ៊ីស្រាអែល កាលពីថ្ងៃចន្ទ បង្ខំឲ្យមានការសងសឹកវិញរបស់អ៊ីស្រាអែលដែលបានសម្លាប់មនុស្សរាប់សិបនាក់ ។

ក្រុមហេសបូឡា និយាយថា ពួកគេបើកការវាយប្រហារ ដើម្បីសងសឹកការសម្លាប់មេដឹកនាំកំពូលអ៊ីរ៉ង់លោក Ayatollah Ali Khamenei នៅក្នុងការវាយប្រហាររបស់សហរដ្ឋអាមេរិក-អ៊ីស្រាអែល ។

អ្នកនាំពាក្យយោធាអ៊ីស្រាអែលលោក Effie Defrin និយាយថា យោធាអ៊ីស្រាអែល បានវាយប្រហារលើគោលដៅក្រុមហេសបូឡាជាង ២៥០កន្លែង នៅទូទាំងប្រទេសលីបង់ ក្នុងរយៈពេល ៤៨ម៉ោងកន្លងមកនេះ ។

អ៊ីស្រាអែលបានឈ្លានពានលីបង់ជាច្រើនលើកច្រើនសារ ចាប់តាំងពីឆ្នាំ ១៩៧៨រហូតមក ហើយនិងបានកាន់កាប់ដែនដីនៅភាគខាងត្បូង រហូតដល់ឆ្នាំ ២០០០ពេលដែលពួកគេដកចេញទៅវិញ បន្ទាប់ពីរយៈពេលច្រើនឆ្នាំនៃសង្រ្គាមទ័ពព្រៃរបស់ក្រុមហេសបូឡា ៕