កងឆ្មាំបដិវត្តន៍ឥស្លាមអ៊ីរ៉ង់ (IRGC) នៅថ្ងៃព្រហស្បតិ៍ (ទី៥ ខែមីនា ឆ្នាំ២០២៦) នេះ បានប្រាប់ឲ្យដឹងថា ខ្លួនបានកំណត់គោលដៅអាកាសយានដ្ឋាន Ben Gurion របស់អ៊ីស្រាអែល និងមូលដ្ឋានទ័ពអាកាសមួយ នៅក្នុងតំបន់នោះ។

ក្នុងសេចក្តីថ្លែងការណ៍មួយដែលផ្សាយដោយទីភ្នាក់ងារសារព័ត៌មាន Tasnim IRGC បានឲ្យដឹងថា៖ «មីស៊ីលធុនធ្ងន់ Khorramshahr-4 ដែលផ្ទុកក្បាលគ្រាប់ទម្ងន់ ១តោន ត្រូវបានបាញ់បង្ហោះនាព្រឹកព្រលឹមថ្ងៃនេះ ឆ្ពោះទៅកាន់ចំណុចកណ្តាលនៃទីក្រុង Tel Aviv អាកាសយានដ្ឋាន Ben Gurion និងមូលដ្ឋានកងអនុសេនាធំទី២៧ របស់កងទ័ពអាកាសអ៊ីស្រាអែល ដែលមានទីតាំងនៅអាកាសយានដ្ឋាននោះ»។

កងទ័ពអ៊ីរ៉ង់បាននិយាយមុននេះថា ខ្លួនបានធ្វើការវាយប្រហារដោយយានដ្រូន នៅក្នុងប្រទេសអ៊ីស្រាអែល នៅថ្ងៃព្រហស្បតិ៍នេះ ក្នុងនោះរួមទាំងទៅលើទីតាំងរ៉ាដាផងដែរ។

យោងតាមការដកស្រង់សម្តីពីកងទ័ពដោយទូរទស្សន៍រដ្ឋ បានឲ្យដឹងថា ការវាយប្រហារទាំងនោះ បានត្រូវចំ «គោលដៅនៅក្នុងទីក្រុង Tel Aviv ក៏ដូចជាមូលដ្ឋានរ៉ាដា Meron» នៅភាគខាងជើងអ៊ីស្រាអែល៕