យោងតាមប្រភពការទូតចំនួនបីបានប្រាប់សារព័ត៌មានរ៉យទ័រថា ប្រទេសចិន កំពុងស្ថិតក្នុងកិច្ចចរចាជាមួយអ៊ីរ៉ង់ ដើម្បីអនុញ្ញាតឱ្យនាវាដឹកប្រេងឆៅ និងនាវាដឹកឧស្ម័នធម្មជាតិរាវ (LNG) របស់ប្រទេសកាតា អាចឆ្លងកាត់ច្រកសមុទ្រ Hormuz បានដោយសុវត្ថិភាព ខណៈសង្រ្គាមរវាងអាមេរិក-អ៊ីស្រាអែល ប្រឆាំងនឹងទីក្រុងតេអេរ៉ង់ កាន់តែមានភាពតានតឹងខ្លាំងឡើង។

សង្រ្គាមដែលឈានចូលដល់ថ្ងៃទី៧ហើយ គិតត្រឹមថ្ងៃសុក្រ ទី៦ ខែមីនា នេះ បានធ្វើឱ្យច្រកសមុទ្រ Hormuz ដែលជាផ្លូវទឹកដឹកជញ្ជូនដ៏សំខាន់មួយសម្រាប់ការផ្គត់ផ្គង់ប្រេងនិងឧស្ម័នធម្មជាតិរាវសកល ចំនួនមួយភាគប្រាំ ឬ ២០% ត្រូវបិទស្ទើរតែទាំងស្រុង។

ប្រភពដដែលបានឱ្យដឹងថា ចិន ដែលមានទំនាក់ទំនងមិត្តភាពជាមួយអ៊ីរ៉ង់ និងពឹងផ្អែកខ្លាំងលើការផ្គត់ផ្គង់ពីមជ្ឈិមបូព៌ា គឺមិនសប្បាយចិត្តនោះទេចំពោះចំណាត់ការរបស់សាធារណរដ្ឋអ៊ិស្លាមមួយនេះ ក្នុងការធ្វើឱ្យកកស្ទះដល់ការដឹកជញ្ជូនតាមច្រកសមុទ្រ ហើយកំពុងដាក់សម្ពាធលើអ៊ីរ៉ង់ ដើម្បីអនុញ្ញាតឱ្យនាវាទាំងនោះ ឆ្លងកាត់ដោយសុវត្ថិភាព។

ចិន ដែលជាប្រទេសមានសេដ្ឋកិច្ចធំជាងគេទីពីរក្នុងពិភពលោក ទទួលបានប្រេងប្រហែល ៤៥% តាមរយៈច្រកសមុទ្រ Hormuz។ ទិន្នន័យតាមដាននាវាបង្ហាញថា នាវាឈ្មោះថា Iron Maiden បានធ្វើដំណើរឆ្លងកាត់ច្រកសមុទ្រនេះកាលពីយប់ថ្ងៃព្រហស្បតិ៍ បន្ទាប់ពីប្តូរសញ្ញាសម្គាល់របស់ខ្លួនទៅជា «ម្ចាស់ជាជនជាតិចិន»។

រដ្ឋាភិបាលអ៊ីរ៉ង់បានប្រកាសកាលពីដើមសប្តាហ៍នេះថា នាវាទាំងឡាយណាដែលជារបស់អាមេរិក អ៊ីស្រាអែល បណ្តាប្រទេសអឺរ៉ុប ឬសម្ព័ន្ធមិត្តរបស់ពួកគេ មិនអនុញ្ញាតឱ្យឆ្លងកាត់ច្រកសមុទ្រ Hormuz ជាដាច់ខាត ប៉ុន្តែសេចក្តីថ្លែងការណ៍នោះមិនបានលើកឡើងពីប្រទេសចិនឡើយ៕