រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz កាលពីថ្ងៃព្រហស្បតិ៍ (៥ មីនា) បានទម្លាយប្រាប់ថា អ៊ីស្រាអែលបានសម្រេចចិត្តសម្លាប់មេដឹកនាំកំពូលអ៊ីរ៉ង់ លោក Ali Khamenei តាំងតែពីខែវិច្ឆិកា ឆ្នាំ២០២៥ មកម៉្លេះ ហើយគ្រោងអនុវត្តប្រតិបត្តិការនេះប្រហែល ៦ខែបន្ទាប់។

គួរឱ្យដឹងថា លោក Khamenei ត្រូវបានសម្លាប់ក្នុងម៉ោងដំបូងនៃយុទ្ធនាការផ្លូវអាកាសរវាងអាមេរិក និងអ៊ីស្រាអែល ដែលបានចាប់ផ្តើមនៅថ្ងៃសៅរ៍ ទី២៨ ខែកុម្ភៈ ឆ្នាំ២០២៦ នេះ ដែលជាការធ្វើឃាតលើកដំបូងបំផុតលើមេដឹកនាំកំពូលរបស់ប្រទេសមួយ ដោយការវាយប្រហារតាមអាកាសបែបនេះ។

ការវាយប្រហារតាមអាកាសរួមគ្នានេះ ជិតដល់ទីបញ្ចប់នៃសប្តាហ៍ដំបូងរបស់ខ្លួនទៅហើយគិតត្រឹមថ្ងៃសុក្រ ទី៦ ខែមីនា ដែលជាថ្ងៃទី៧នៃជម្លោះ បន្ទាប់ពីរលកប្រហារលើកដំបូង បានសម្លាប់មេដឹកនាំកំពូលរបស់អ៊ីរ៉ង់ និងបង្កឱ្យមានសង្គ្រាមក្នុងតំបន់ ជាមួយនឹងការវាយប្រហារសងសឹករបស់អ៊ីរ៉ង់លើអ៊ីស្រាអែល រដ្ឋឈូងសមុទ្រ និងអ៊ីរ៉ាក់ ព្រមទាំងការវាយប្រហាររបស់អ៊ីស្រាអែល ប្រឆាំងនឹងសម្ព័ន្ធមិត្តរបស់អ៊ីរ៉ង់ គឺក្រុមហេសបូឡា នៅក្នុងប្រទេសលីបង់។

លោក Katz បាននិយាយថា «នៅខែវិច្ឆិកា ឆ្នាំមុន លោកនាយករដ្ឋមន្ត្រីអ៊ីស្រាអែល Benjamin Netanyahu បានកោះប្រជុំក្រុមមន្រ្តី ហើយលោកបានកំណត់គោលដៅលុបបំបាត់លោក Khamenei ចំណែកពេលវេលាត្រូវបានកំណត់នៅពាក់កណ្តាលឆ្នាំ២០២៦»។ ប្រមុខការពារជាតិរូបនេះបន្តថា អ៊ីស្រាអែលបានចែករំលែកផែនការនេះជាមួយអាមេរិក ហើយបានលើកឡើងម្ដងទៀតអំឡុងខែមករាបន្ទាប់ពីការតវ៉ាផ្ទុះឡើងនៅអ៊ីរ៉ង់ ដោយនោះក៏ជាពេលវេលាដែលអ៊ីស្រាអែល បារម្ភថា របបអ៊ីរ៉ង់ អាចនឹងបើកការវាយប្រហារប្រឆាំងនឹងអ៊ីស្រាអែល និងផលប្រយោជន៍អាមេរិក នៅមជ្ឈិមបូព៌ា។

អ៊ីស្រាអែលនិយាយថា គោលបំណងរបស់ខ្លួនគឺដើម្បីលុបបំបាត់ការគំរាមកំហែងអត្ថិភាពដែលខ្លួនមើលឃើញក្នុងកម្មវិធីនុយក្លេអ៊ែរ និងគម្រោងមីស៊ីលបាលីស្ទិករបស់អ៊ីរ៉ង់ និងដើម្បីនាំមកនូវការផ្លាស់ប្ដូររបប ប៉ុន្តែរហូតមកដល់ពេលនេះ មេដឹកនាំអ៊ីរ៉ង់ មិនបានបង្ហាញសញ្ញានៃការលះបង់អំណាចនោះទេ៕