រដ្ឋ Oregon រួមជាមួយរដ្ឋចំនួន ២៣ ផ្សេងទៀត បានដាក់ពាក្យបណ្តឹងកាលពីថ្ងៃព្រហស្បតិ៍ សប្ដាហ៍នេះ ដោយស្វែងរកការរារាំងពន្ធជុំថ្មីប្រកាសដោយប្រធានាធិបតីអាមេរិក លោក Donald Trump។

បណ្តឹង ដែលបានដាក់នៅក្នុងតុលាការពាណិជ្ជកម្មអន្តរជាតិសហរដ្ឋអាមេរិក បានអះអាងថា គោលនយោបាយពន្ធនេះរំលោភលើច្បាប់សហព័ន្ធ ធ្វើឱ្យខូចដល់ការបែងចែកអំណាចតាមរដ្ឋធម្មនុញ្ញ និងរំលោភលើច្បាប់នីតិវិធីរដ្ឋបាល។

រដ្ឋអាជ្ញារដ្ឋ Oregon លោក Dan Rayfield បាននិយាយនៅក្នុងសេចក្តីថ្លែងការណ៍មួយថា បណ្តឹងនេះប្រឆាំងនឹងការប៉ុនប៉ងចុងក្រោយរបស់រដ្ឋបាលក្នុងការបង្កើនពន្ធនៅទូទាំងពិភពលោកដោយគ្មានការយល់ព្រមពីសភាអាមេរិក។

លោក Rayfield បាននិយាយថា ការសំខាន់នៅពេលនេះគួរតែផ្តោតលើការសងប្រាក់វិញ ដល់ប្រជាជន មិនមែនបង្កើនពន្ធខុសច្បាប់ទ្វេដងនោះទេ ដោយបន្ថែមថា ពលរដ្ឋអាមេរិកជាច្រើនកំពុងតស៊ូចំពោះការកើនឡើងនៃតម្លៃគ្រឿងទេស សម្លៀកបំពាក់ និងតម្រូវការចាំបាច់ផ្សេងទៀត។

យោងតាមសេចក្តីថ្លែងការណ៍ លោក Trump បានដាក់ពន្ធអស់រយៈពេលជាងមួយឆ្នាំដោយគ្មានសិទ្ធិអំណាចផ្នែកច្បាប់ត្រឹមត្រូវ។ ដំបូងឡើយ ប្រធានាធិបតី បានអះអាងថា ច្បាប់អំណាចសេដ្ឋកិច្ចគ្រាអាសន្នអន្តរជាតិ (IEEPA) អនុញ្ញាតឱ្យរូបលោកយកពន្ធលើផលិតផលពីប្រទេសណាមួយនៅកម្រិតណាមួយ និងសម្រាប់រយៈពេលណាមួយ។

សេចក្តីថ្លែងការណ៍នេះបាននិយាយថា ទោះជាយ៉ាងណាក៏ដោយ តុលាការកំពូលសហរដ្ឋអាមេរិកបានសម្រេចកាលពីថ្ងៃទី២០កុម្ភៈ២០២៦នេះ ថា ពន្ធដែលដាក់ក្រោមច្បាប់អំណាចសេដ្ឋកិច្ចគ្រាអាសន្នអន្តរជាតិ គឺខុសច្បាប់។ បន្ទាប់ពីសេចក្តីសម្រេចនេះ លោក Trump បានប្រើច្បាប់មួយផ្សេងទៀត គឺមាត្រា ១២២ នៃច្បាប់ពាណិជ្ជកម្មឆ្នាំ ១៩៧៤ ហើយបានប្រកាសពន្ធចំនួន១៥ % លើផលិតផលភាគច្រើននៅទូទាំងពិភពលោក ៕