គណបក្សរបស់លោក Balendra Shah អតីតតារាចម្រៀងរ៉េបដែលប្រែក្លាយជាអ្នកនយោបាយ បានកំពុងនាំមុខគេក្នុងការរាប់សន្លឹកឆ្នោតដំបូង នៃការបោះឆ្នោតសកលរបស់ប្រទេសនេប៉ាល់ ដោយបាននាំមុខដាច់ឆ្ងាយពីគូប្រជែងផ្សេងទៀត រួមទាំងអតីតនាយករដ្ឋមន្ត្រីដែលត្រូវបានបង្ខំឱ្យចុះចេញពីតំណែងផងដែរ បន្ទាប់ពីមានការបះបោរជាប្រវត្តិសាស្ត្រដែលដឹកនាំដោយយុវជន កាលពីឆ្នាំមុន។

លោក Shah វ័យ ៣៥ ឆ្នាំ ដែលជាអតីតអភិបាលក្រុងកដ្ឋមណ្ឌូ មានសន្ទុះលើការប្រកួតប្រជែងតំណែងនាយករដ្ឋមន្ត្រីនេប៉ាល់ ក្នុងអំឡុងយុទ្ធនាការឃោសនា ដោយទទួលបានការគាំទ្រយ៉ាងខ្លាំងទូទាំងប្រទេស។ យោងតាមនិន្នាការនៃការរាប់សន្លឹកឆ្នោតដំបូងពីគណៈកម្មាធិការរៀបចំការបោះឆ្នោតនេប៉ាល់ នៅព្រឹកថ្ងៃសុក្រ ទី៦ ខែកុម្ភៈ នេះបានបង្ហាញថា គណបក្ស Rastriya Swatantra ដែលជាបក្សកណ្ដាលនិយម និងទើបបង្កើតកាលពី ៣ ឆ្នាំមុនរបស់លោក Shah កំពុងនាំមុខចំនួន ៣៧ អាសនៈ ខណៈគណបក្សកុម្មុយនីស្តនេប៉ាល់ (UML) របស់អតីតនាយករដ្ឋមន្ត្រី K P Sharma Oli កំពុងនាំមុខតែ ៣ អាសនៈប៉ុណ្ណោះ។

ក្រុមមន្ត្រីបាននិយាយថា លទ្ធផលច្បាស់ការអាចនឹងកើតមាននៅល្ងាចថ្ងៃសុក្រ ឬថ្ងៃសៅរ៍ ស្អែកនេះ។ ក្នុងចំណោមអាសនៈសរុបចំនួន ២៧៥ នៅក្នុងសភាជាន់ទាបរបស់នេប៉ាល់ ការរាប់សន្លឹកឆ្នោតកំពុងដំណើរការសម្រាប់អាសនៈចំនួន ១៦៥ ដែលត្រូវបានជ្រើសរើសដោយការបោះឆ្នោតផ្ទាល់ ខណៈដែល ១១០ អាសនៈទៀត នឹងត្រូវជ្រើសរើសតាមប្រព័ន្ធសមាមាត្រ។

លោក Shah មានប្រជាប្រិយភាពយ៉ាងខ្លាំង និងបានទាក់ទាញហ្វូងមនុស្សយ៉ាងច្រើនក្នុងអំឡុងយុទ្ធនាការបោះឆ្នោតរបស់លោក ដោយផ្សារភ្ជាប់ទំនាក់ទំនងជាមួយម្ចាស់ឆ្នោតវ័យក្មេងយ៉ាងច្រើនកុះករ។ ដោយស្ថិតនៅចន្លោះចិន និងឥណ្ឌា នេប៉ាល់ជាប្រទេសដែលមានប្រជាជន ៣០ លាននាក់មួយនេះ បានញាំញីដោយអស្ថិរភាពនយោបាយអស់ជាច្រើនទសវត្សរ៍មកហើយ ដែលបានជះឥទ្ធិពលដល់សេដ្ឋកិច្ចដ៏លំបាករបស់ខ្លួន និងធ្វើឱ្យបញ្ហាគ្មានការងារធ្វើ កាន់តែអាក្រក់ទៅៗក្នុងចំណោមយុវជន៕