បន្ទាប់ពីចៅក្រមសហព័ន្ធកាលពីថ្ងៃពុធសប្ដាហ៍នេះ បានបង្គាប់ឱ្យរដ្ឋាភិបាលអាមេរិក ចាប់ផ្តើមសងប្រាក់ពន្ធគ្រាអាសន្នរបស់លោកប្រធានាធិបតី Donald Trump ត្រឡប់ទៅវិញ ដែលតុលាការកំពូលអាមេរិក បានសម្រេចថាជាការប្រមូលពន្ធដោយខុសច្បាប់ ពេលនេះក្រុមអ្នកវិភាគថវិកាបានប៉ាន់ប្រមាណថា ប្រាក់ដែលនឹងត្រូវសងត្រឡប់ទៅឱ្យក្រុមហ៊ុននាំចូលវិញ មានចន្លោះពី ១៦៨ ពាន់លាន ទៅ ១៨២ ពាន់លានដុល្លារអាមេរិក។

យន្តការសម្រាប់អនុវត្តសំណង មិនទាន់ច្បាស់លាស់នៅឡើយទេ ប៉ុន្តែលោក Richard Eaton ចៅក្រមជាន់ខ្ពស់នៃតុលាការពាណិជ្ជកម្មអន្តរជាតិ បានបង្គាប់ឱ្យភ្នាក់ងារគយ និងការពារព្រំដែន (CBP) ត្រូវតែរាយការណ៍នៅថ្ងៃសុក្រ ទី៦ ខែមីនានេះ (ពេលវេលានៅសហរដ្ឋអាមេរិក) អំពីផែនការបឋមសម្រាប់ការសងប្រាក់ទៅវិញ ដើម្បីជៀសវាងការប្តឹងផ្តល់បែបបុគ្គល រាប់ពាន់ករណី។ លោក Eaton បានថ្លែងក្នុងសវនាការកាលពីថ្ងៃពុធថា៖ «លោកចង់បញ្ជាក់ឱ្យច្បាស់ទៅកាន់សេវាគយថា ពួកគេត្រូវតែសងរាល់ប្រាក់ដែលបានប្រមូលដោយខុសច្បាប់ទាំងអស់»។

យោងតាមសារព័ត៌មានរ៉យទ័រ សេដ្ឋវិទូនៅក្រុមស្រាវជ្រាវសារពើពន្ធនៃសាកលវិទ្យាល័យ Pennsylvania ប៉ាន់ប្រមាណថា ភ្នាក់ងារ CBP ប្រមូលចំណូលសរុបបានរហូតដល់ ១៨២ ពាន់លានដុល្លារ ពីពន្ធដែលបានដាក់ចេញ ក្រោមច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ចន្លោះពីថ្ងៃទី ៤ ខែកុម្ភៈ ឆ្នាំ ២០២៥ ដល់ថ្ងៃទី ២៣ ខែកុម្ភៈ ឆ្នាំ ២០២៦។

ស្ថាប័ននេះប្រើវិធីសាស្ត្រផ្សេងមួយទៀត ដើម្បីគណនាការប៉ាន់ស្មានទីពីររបស់ខ្លួន ដែលបង្ហាញឱ្យឃើញពីលទ្ធភាពមួយទៀតថា សំណងអាចមានចំនួនប្រហែល ១៧៧ ពាន់លានដុល្លារ ចេញពីចំណូលពន្ធ IEEPA។ ក្រុមសេដ្ឋវិទូរកឃើញតួលេខទាំងនេះ តាមរយៈការគណនាភាគរយនៃបង្កាន់ដៃពន្ធគយសរុបរបស់ក្រសួងរតនាគារអាមេរិក ដែលជាប្រភេទពន្ធ IEEPA រហូតដល់ថ្ងៃទី ១៤ ខែធ្នូ ឆ្នាំ២០២៥ រួចអនុវត្តសមាមាត្រដដែលនោះ ទៅលើបង្កាន់ដៃពន្ធគយនៅរយៈពេលបន្ទាប់។ គួរឱ្យដឹងថា របាយការណ៍ចុងក្រោយបំផុតរបស់ភ្នាក់ងារ CBP បានបង្ហាញេពីតួលេខចំនួន ១៣៣,៥ ពាន់លានដុល្លារ ក្នុងការវាយតម្លៃពន្ធ IEEPA កាលពីថ្ងៃទី ១៤ ខែធ្នូ កន្លងទៅ៕