បណ្តាប្រទេសសហភាពអឺរ៉ុប (EU) បានផ្តល់ការអនុម័តចុងក្រោយកាលពីថ្ងៃព្រហស្បតិ៍ចំពោះវិសោធនកម្មច្បាប់អាកាសធាតុអឺរ៉ុប ដោយកំណត់គោលដៅកម្រិតមធ្យមតាមផ្លូវច្បាប់ដើម្បីកាត់បន្ថយការបំភាយឧស្ម័នផ្ទះកញ្ចក់សុទ្ធរបស់ប្លុកនេះចំនួន៩០ភាគរយនៅឆ្នាំ២០៤០ បើប្រៀបធៀបទៅនឹងកម្រិតឆ្នាំ ១៩៩០ ដែលពង្រឹងមធ្យោបាយរបស់សហភាពអឺរ៉ុបឆ្ពោះទៅរកអព្យាក្រឹតភាពអាកាសធាតុនៅត្រឹមឆ្នាំ ២០៥០។

ក្រុមប្រឹក្សាសហភាពអឺរ៉ុបបាននិយាយនៅក្នុងសេចក្តីថ្លែងការណ៍ថា ក្រោមច្បាប់ដែលបានធ្វើវិសោធនកម្ម ចាប់ពីឆ្នាំ២០៣៦ រដ្ឋជាសមាជិកសហភាពអឺរ៉ុបនឹងត្រូវបានអនុញ្ញាតឱ្យរាប់បញ្ចូល «ឥណទានអន្តរជាតិដែលមានគុណភាព» ឆ្ពោះទៅរកការសម្រេចគោលដៅឆ្នាំ២០៤០ ដែលកំណត់ត្រឹម៥ភាគរយនៃការបំភាយឧស្ម័នសរុបឆ្នាំ ១៩៩០ របស់សហភាពអឺរ៉ុប។ នេះមានន័យថា យ៉ាងហោចណាស់ ៨៥ ភាគរយនៃការកាត់បន្ថយការបំភាយឧស្ម័នត្រូវតែសម្រេចបាននៅក្នុងប្លុកនេះ។

សេចក្តីថ្លែងការណ៍បាននិយាយបន្ថែមថា ឥណទានត្រូវតែផ្អែកលើសកម្មភាពកាត់បន្ថយឧស្ម័នផ្ទះកញ្ចក់ដែលអាចទុកចិត្តបាននៅក្នុងប្រទេសជាដៃគូ និងត្រូវស្របតាមកិច្ចព្រមព្រៀងទីក្រុងប៉ារីស។

ច្បាប់ដែលបានធ្វើវិសោធនកម្មនេះ ក៏បានពន្យារពេលការដាក់ឲ្យដំណើរការប្រព័ន្ធពាណិជ្ជកម្មដែលមានការបំភាយឧស្ម័នរបស់សហភាពអឺរ៉ុប គ្របដណ្តប់លើការដឹកជញ្ជូនតាមផ្លូវគោក និងវិស័យផ្សេងៗទៀត ដោយបានផ្លាស់ប្តូរកាលបរិច្ឆេទចាប់ផ្តើមរបស់ខ្លួនពីឆ្នាំ២០២៧ ដល់ឆ្នាំ ២០២៨។