មេបញ្ជាការកងរាជអាវុធហត្ថខេត្តកោះកុង លើកឡើងថា ស្រ្តីជាកងទ័ពបានចូលរួមចំណែកយ៉ាងសកម្មក្នុងបុព្វហេតុបម្រើជាតិមាតុភូមិអំឡុងពេលមានបញ្ហាជម្លោះព្រំដែនជាមួយភាគីថៃ ដោយលោកជំរុញឱ្យស្រ្តីបន្តពង្រឹងភាពអង់អាចក្នុងសេដ្ឋកិច្ចឌីជីថល បន្ថែមទៀត។

ការលើកសរសើរអំពីភាពអង់អាចរបស់ស្រ្តីជាកងទ័ពនៅពេលនេះរបស់លោកឧត្តមសេនីយ៍ត្រី តាំង ឈុងស្រេង មេបញ្ជាការកងរាជអាវុធហត្ថខេត្តកោះកុង បានធ្វើឡើងនៅថ្ងៃទី៧ ខែមីនា ក្នុងពិធីអបអរសាទរខួបលើកទី១១៥ នៃទិវានារីអន្តរជាតិ ៨មីនា ឆ្នាំ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្រ្តី និងគ្រួសារ»។

លោកឧត្តមសេនីយ៍ត្រី តាំង ឈុនស្រេង បានគូសបញ្ជាក់ទៀតថា ស្ត្រីជាកងទ័ពនៅខេត្តកោះកុង ក៏ដូចជាទូទាំងប្រទេសសកម្ពុជា បានពលីកម្មគ្រប់បែបយ៉ាងក្នុងការការពារបូរណភាពទឹកដី ដោយទឹកចិត្តអង់អាចក្លាហាន ប្រឆាំងទៅនឹងអំពើឈ្លានពានរបស់កងទ័ពថៃ ពិសេសសង្គ្រាមកើតឡើងកាលពីឆ្នាំ២០២៥កន្លងទៅនេះ។ ដូច្នេះការលះបង់ដ៏ធំធេងរបស់ស្ត្រីកងទ័ព បង្ហាញពីវីរភាពមិនអាចកាត់ថ្លៃបាន ក្នុងនាមស្ត្រីជាម្ដាយ ជាកូន និងជាប្រពន្ធ ត្រូវបានលើកទឹកចិត្តដល់ឪពុក កូន ប្ដី និងសាច់ញាតិ ចំពោះការខិតខំប្រឆាំងនឹងអំពើឈ្លានពានរបស់បច្ចាមិត្ត ដែលរំលោភបំពានដែនដីរបស់កម្ពុជា។

ទន្ទឹមនោះ លោកមេបញ្ជាការកងរាជអាវុធហត្ថខេត្តកោះកុង ក៏បានរំលេចដែរថា រាជរដ្ឋាភិបាល យោងតាមបទបញ្ជាដែលបានអនុវត្ត កងរាជអាវុធហត្ថខេត្ត នៅតែបន្តទប់ស្កាត់និងបង្រ្កាបបទល្មើសអនឡាញ គ្រឿងញៀន ក្មេងទំនើង និងការពារបូរណភាពទឹកដីអោយបានជាដាច់ខាតផងដែរ។

តបនឹងគោលនយោបាយរបស់រាជរដ្ឋាភិបាលអាណត្តិទី៧ លោកឧត្តមសេនីយ៍ត្រី តាំង ឈុនស្រេង អះអាងថា រាជរដ្ឋាភិបាល ផ្តល់ការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី និងក្មេងស្រី តាមរយៈយុទ្ធសាស្ត្រជាអាទិភាពចំនួន៤ គឺទី១- លើកកម្ពស់សីលធម៌សង្គម តម្លៃស្ត្រី និងទប់ស្កាត់អំពើហិង្សាទាក់ទងនឹងយេនឌ័រ ។ ទី២- អនុវត្តតាមផែនការសកម្មភាពជាតិ ស្ដីពីស្ត្រី សន្តិភាពនិងសន្តិសុខ។ទី៣- លើកកម្ពស់កិច្ចគាំពារសង្គមដែលឆ្លើយតបនឹងយេនឌ័រការងារសមរម្យនឹងកន្លែងដែលមានមេត្រីភាព សម្រាប់ស្ត្រី និងការថែទាំសុខភាពឆ្ពោះទៅកម្មវិធីគ្របដណ្តប់ជាសកលសំដៅធានាឲ្យប្រជាពលរដ្ឋ គ្រប់រូបទទួលបានដោយសមធម៌។ និងទី៤-ពង្រឹងភាពអង់អាចដល់ស្ត្រីក្នុងសេដ្ឋកិច្ចឌីជីថល សហគ្រិនភាព ការអភិវឌ្ឍជំនាញ សេដ្ឋកិច្ចគិតគូរពី សុខុមាលភាព អភិវឌ្ឍបៃតងការប្រែប្រួលអាកាសធាតុ ព្រមទាំងភាពជាអ្នកដឹកនាំ និងអភិបាលកិច្ច ប្រកបដោយបរិយាបន្ន៕ (អត្តបទឈឹម មករា)