​សហរដ្ឋអាមេរិក៖ លោក​ប្រធានាធិបតី​សហរដ្ឋអាមេរិក Joe Biden បាន​បញ្ជាក់​ឡើងវិញ​ពី​ការព្រមាន​របស់​លោក​ដល់​ប្រទេស​ចិន ទល់នឹង​ការ​ផ្ដល់​ជំនួយ​ខាង​យោធា​ដល់​រុស្ស៊ី​ក្នុង​សង្គ្រាម​នៅ​អ៊ុយ​ក្រែ​ន ដោយ​និយាយ​ថា លោក​បាន​បញ្ជាក់​ច្បាស់​ហើយ​ការ​ជួយ​នោះ​នឹង​ជួប​ផលវិបាក​ធ្ងន់ធ្ងរ ក្នុង​ជំនួប​តាម​ទូរស័ព្ទ​ជាមួយ​លោក​ប្រធានាធិបតី​ចិន Xi Jinping កាលពី​សប្ដាហ៍​មុន​។

​ថ្លែង​ទៅកាន់​ក្រុម​អ្នកសារព័ត៌មាន​នៅ​ឯ​ជំនួប​កំពូល​ណា​តូ ក្នុង​ទីក្រុង​ព្រុ​ច​សែ​ល​កាលពី​ថ្ងៃ​ព្រហស្បតិ៍ ប្រធានាធិបតី​សហរដ្ឋអាមេរិក​រូប​នេះ​លើក​ឡើង​ថា លោក Xi នឹង​យល់ថា ​ផល​ប្រយោជន៍​សេដ្ឋកិច្ច​របស់​ចិន​ពឹង​ផ្អែកលើ​លោក​ខាង​លិចមិនមែន​រុស្ស៊ី​នោះ​ទេ​។ លោក Biden បាន​និយាយ​អំពី​ការសន្ទនា​របស់​លោក​ជាមួយ​មេដឹកនាំ​ចិន​ថា លោក​មិនបាន​គំរាមកំហែង​ទេ ប៉ុន្តែ​លោក​បាន​ចង្អុល​បង្ហាញ​ពី​ចំនួន​សាជីវកម្ម​អាមេរិក និង​បរទេស​ដែល​បាន​ចាក​ចេញពី​ប្រទេស​រុស្ស៊ី ដោយ​សារតែ​អាកប្បកិរិយា​ព្រៃផ្សៃ​របស់​រុស្ស៊ី​។​

​លោក Biden ​បាន​បន្ថែម​ថា លោក​បាន​ប្រា​ប់​លោក Xi រួចហើយ​ថា លោក Xi នឹង​ដាក់​ខ្លួនឯង​ក្នុង​ស្ថានភាព​គ្រោះថ្នាក់​នៅ​ក្នុង​កិច្ច​ខិតខំ​ប្រឹងប្រែង​រប​ស់​លោក​ ​ដើម្បី​ពង្រឹង​ទំនាក់ទំនង​សេដ្ឋកិច្ច​ជាមួយ​សហរដ្ឋអាមេរិក និង​អឺរ៉ុប បើ​សិន​ប្រទេស​ចិន​ចង់​ផ្ដល់​ជំនួយ​ឲ្យ​រុស្ស៊ី​៕

អត្ថបទ៖ សុខមាន