ប្រទេសបារ៉ែន នៅថ្ងៃចន្ទ (ទី៩ ខែមីនា ឆ្នាំ២០២៦) នេះ បានឲ្យដឹងថា ការវាយប្រហារដោយយានដ្រូនរបស់អ៊ីរ៉ង់ ពេញមួយយប់ នៅលើកោះ Sitra បានបណ្ដាលឲ្យមនុស្សយ៉ាងហោចណាស់ ៣២នាក់រងរបួស ខណៈដែលបណ្ដាប្រទេសឈូងសមុទ្រ បានរាយការណ៍ពីការវាយប្រហារថ្មីៗ ដោយទីក្រុងតេអេរ៉ង់ បានជំរុញការវាយប្រហារសងសឹករបស់ខ្លួន នៅទូទាំងតំបន់។

នៅក្នុងសេចក្តីថ្លែងការណ៍មួយដែលចេញផ្សាយដោយទីភ្នាក់ងារសារព័ត៌មានរដ្ឋ ក្រសួងសុខាភិបាល បានឲ្យដឹងថា អ្នករងរបួសទាំងអស់ គឺជាពលរដ្ឋបារ៉ែន ហើយមាន «ករណីធ្ងន់ធ្ងរ» ចំនួន ៤នាក់ ក្នុងនោះរួមមានទាំងកុមារផងដែរ។

យោងតាមក្រសួង បានឲ្យដឹងថា អ្នករងរបួស រួមមានក្មេងស្រីអាយុ ១៧ឆ្នាំម្នាក់ដែលរងរបួសក្បាល និងភ្នែកធ្ងន់ធ្ងរ និងទារកអាយុ ២ខែ។

អ្នកសារព័ត៌មាន AFP បានរាយការណ៍ថា ការផ្ទុះជាច្រើន ក៏ត្រូវបានគេឮផងដែរនៅថ្ងៃទី៩ ខែមីនានេះ នៅរដ្ឋធានីដូហារបស់កាតា ខណៈដែលប្រទេសកាតា អារ៉ាប៊ីសាអ៊ូឌីត អេមីរ៉ាតអារ៉ាប់រួម និងគុយវ៉ែត សុទ្ធតែបានរាយការណ៍ពីការវាយប្រហារថ្មីៗ។

ទីក្រុងដូហាត្រូវបានកំណត់គោលដៅដោយយានដ្រូន និងមីស៊ីលរបស់អ៊ីរ៉ង់ ចាប់តាំងពីអ៊ីរ៉ង់បានបើកយុទ្ធនាការសងសឹកដ៏ធំទូលាយ នៅទូទាំងឈូងសមុទ្រ បន្ទាប់ពីមានការវាយប្រហាររបស់សហរដ្ឋអាមេរិក និងអ៊ីស្រាអែលប្រឆាំងនឹងសាធារណរដ្ឋឥស្លាម។

គួរបញ្ជាក់ថា បណ្តាប្រទេសឈូងសមុទ្របានទទួលរងនូវការឆ្លើយតបភាគច្រើនរបស់ទីក្រុងតេអេរ៉ង់ បន្ទាប់ពីសហរដ្ឋអាមេរិក និងអ៊ីស្រាអែលបានបើកយុទ្ធនាការផ្លូវអាកាសដ៏ធំ ប្រឆាំងនឹងអ៊ីរ៉ង់កាលពីថ្ងៃទី២៨ ខែកុម្ភៈ។ ប្រធានាធិបតីអ៊ីរ៉ង់ លោក Masoud Pezeshkian បានព្រមានថា សាធារណរដ្ឋឥស្លាម «នឹងត្រូវបង្ខំចិត្តឆ្លើយតប» ប្រឆាំងនឹងប្រទេសជិតខាងរបស់ខ្លួន ប្រសិនបើទឹកដីរបស់ពួកគេ ត្រូវបានប្រើប្រាស់ ដើម្បីវាយប្រហារលើខ្លួន៕