អគ្គនាយកទីភ្នាក់ងារថាមពលអាតូមិកអន្តរជាតិ (IAEA) លោក Rafael Grossi បានថ្លែងកាលពីថ្ងៃចន្ទ (៩ មីនា) ថា ចំនួនជិតពាក់កណ្តាលនៃសារធាតុអ៊ុយរ៉ានីញ៉ូមរបស់អ៊ីរ៉ង់ ដែលមានកម្រិតភាពសុទ្ធដល់ទៅ ៦០% ពោលគឺជាកម្រិតកៀកនឹងការផលិតអាវុធនុយក្លេអ៊ែរ ត្រូវបានរក្សាទុកក្នុងបណ្តាញផ្លូវរូងក្រោមដីមួយនៅទីក្រុង Isfahan ហើយទំនងជាលាក់ទុកនៅទីនោះនៅឡើយ។

លោក Grossi បានប្រាប់អ្នកយកព័ត៌មាននៅទីក្រុងប៉ារីសថា៖ «អ្វីដែល IAEA ជឿជាក់នោះគឺថា គិតត្រឹមការត្រួតពិនិត្យចុងក្រោយរបស់ស្ថាប័ន IAEA បានឱ្យដឹងថា ទីក្រុង Isfahan មានអ៊ុយរ៉ានីញ៉ូមកម្រិតភាពសុទ្ធ ៦០% ចំនួនជាង ២០០ គីឡូក្រាម ឬអាចលើសនេះបន្តិចបន្តួច»។ លោកបន្តថា ស្តុកទាំងនោះ «ជាចម្បង» គឺស្ថិតនៅ Isfahan ហើយសារធាតុខ្លះដែលរក្សាទុកនៅកន្លែងផ្សេងទៀត អាចនឹងត្រូវបានបំផ្លាញចោលរួចទៅហើយ។

បណ្តាញផ្លូវរូងក្រោមដីនេះ គឺជាគោលដៅតែមួយគត់ ដែលហាក់ដូចជាមិនបានរងការខូចខាតធ្ងន់ធ្ងរ នៅក្នុងការវាយប្រហារកាលពីខែមិថុនាឆ្នាំមុន ដោយអ៊ីស្រាអែល និងសហរដ្ឋអាមេរិក លើទីតាំងនុយក្លេអ៊ែររបស់អ៊ីរ៉ង់។ ក្រុមអ្នកការទូតបានលើកឡើងជាយូរមកហើយថា រោងចក្រនៅទីក្រុង Isfahan ត្រូវបានប្រើសម្រាប់រក្សាទុកអ៊ុយរ៉ានីញ៉ូម ដែលមានកម្រិតភាពសុទ្ធ ៦០% ខណៈទីភ្នាក់ងារ IAEA ក៏បានបញ្ជាក់ពីបញ្ហានេះនៅក្នុងរបាយការណ៍របស់ខ្លួនជូនរដ្ឋជាសមាជិកកាលពីខែមុន ប៉ុន្តែមិនបានលម្អិតពីចំនួនពិតប្រាកដនោះទេ។

យោងតាមការប៉ាន់ស្មានរបស់ទីភ្នាក់ងារ IAEA បានបង្ហាញថា នៅពេលដែលអ៊ីស្រាអែល បើកការវាយប្រហារលើកដំបូងក្នុងខែមិថុនា អ៊ីរ៉ង់មានអ៊ុយរ៉ានីញ៉ូមកម្រិតសុទ្ធ ៦០% ចំនួន ៤៤០,៩ គីឡូក្រាម។ ប្រសិនបើត្រូវបានចម្រាញ់បន្ថែមទៀត ចំនួននេះនឹងផ្តល់នូវសារធាតុផ្ទុះដែលត្រូវការ សម្រាប់ផលិតអាវុធនុយក្លេអ៊ែរចំនួន ១០គ្រាប់ នេះបើយោងតាមរង្វាស់កំណត់របស់ IAEA៕