ប្រមុខក្រុមប្រឹក្សារបស់សហភាពអឺរ៉ុប (EU) លោក Antonio Costa នៅថ្ងៃអង្គារ (ទី១០ ខែមីនា ឆ្នាំ២០២៦) នេះ បានលើកឡើងថា រហូតមកដល់ពេលនេះ រុស្ស៊ីគឺជាអ្នកឈ្នះតែមួយគត់ពីសង្គ្រាម នៅតំបន់មជ្ឈិមបូព៌ា ខណៈដែលតម្លៃថាមពលហក់ឡើងខ្ពស់ ហើយការចាប់អារម្មណ៍ចំពោះសង្គ្រាមរបស់ប្រទេសនេះ ប្រឆាំងនឹងអ៊ុយក្រែន បានរសាត់បាត់។

ក្នុងសុន្ទរកថាទៅកាន់ឯកអគ្គរដ្ឋទូត EU នៅទីក្រុងប្រ៊ុចសែល ប្រទេសបែលហ្ស៊ិក លោក Costa បានថ្លែងថា៖ «រហូតមកដល់ពេលនេះ មានតែអ្នកឈ្នះម្នាក់គត់នៅក្នុងសង្គ្រាមនេះ គឺរុស្ស៊ី។ ប្រទេសនេះទទួលបានធនធានថ្មី ដើម្បីផ្តល់ហិរញ្ញប្បទានដល់សង្គ្រាមរបស់ខ្លួន ប្រឆាំងនឹងអ៊ុយក្រែន ខណៈដែលតម្លៃថាមពលឡើងខ្ពស់។ ប្រទេសនេះទទួលបានផលចំណេញពីការបង្វែរសមត្ថភាពយោធា ដែលអាចត្រូវបានបញ្ជូនទៅគាំទ្រអ៊ុយក្រែន។ ហើយប្រទេសនេះទទួលបានអត្ថប្រយោជន៍ពីការយកចិត្តទុកដាក់ដែលមានកាន់តែតិចទៅៗ ចំពោះសមរភូមិនៅអ៊ុយក្រែន ខណៈដែលជម្លោះនៅមជ្ឈិមបូព៌ាកំពុងក្លាយជាចំណុចចាប់អារម្មណ៍ខ្លាំង»។

លោក Costa បានសង្កត់ធ្ងន់លើតម្រូវការ ដើម្បីឲ្យ EU ការពារសណ្តាប់ធ្នាប់ផ្អែកលើច្បាប់អន្តរជាតិ ដែលលោកបាននិយាយថា ឥឡូវនេះកំពុងត្រូវបានធ្វើឲ្យប៉ះពាល់ដោយសហរដ្ឋអាមេរិក និងដើម្បីឲ្យគ្រប់ភាគីទាំងអស់នៅមជ្ឈិមបូព៌ាវិលត្រឡប់ទៅតុចរចាវិញ។

លោកបានបន្ថែមថា៖ «សេរីភាព និងសិទ្ធិមនុស្សមិនអាចសម្រេចបានតាមរយៈគ្រាប់បែកនោះទេ។ មានតែច្បាប់អន្តរជាតិប៉ុណ្ណោះ ដែលគាំទ្រដល់ដំណើរការទាំងនោះ។ យើងត្រូវតែជៀសវាងការបង្កើនភាពតានតឹងបន្ថែមទៀត។ ផ្លូវបែបនេះគំរាមកំហែងដល់តំបន់មជ្ឈិមបូព៌ា អឺរ៉ុប និងផ្សេងទៀត»៕