សវនកររដ្ឋ បាននិយាយនៅថ្ងៃអង្គារ (ទី១០ ខែមីនា ឆ្នាំ២០២៦) នេះថា របងបេតុងដែលត្រូវបានចាត់ទុកថា មានចំណែកធំ ចំពោះឧបទ្ទវហេតុយន្តហោះនៅប្រទេសកូរ៉េខាងត្បូង ដែលបានបណ្ដាលឲ្យមនុស្ស ១៧៩នាក់សា្លប់ កាលពីខែធ្នូ ឆ្នាំ២០២៤ ត្រូវបានសាងសង់ឡើង ដើម្បីកាត់បន្ថយការចំណាយ។

ជើងហោះហើរលេខ ២២១៦ របស់ក្រុមហ៊ុនអាកាសចរណ៍ Jeju Air កំពុងចុះចតនៅអាកាសយានដ្ឋានអន្តរជាតិ Muan របស់កូរ៉េខាងត្បូង ក្រោយធ្វើដំណើរពីថៃ ដែលនៅពេលនោះវាបានបុកហ្វូងសត្វស្លាប ហើយត្រូវបានបង្ខំចុះចតតាមនីតិវិធីគ្រាអាសន្នដោយមិនទម្លាក់កង់។

បើទោះបីជាអ្នកបើកយន្តហោះបានគ្រប់គ្រងទម្លាក់យន្តហោះដល់ដី ហើយរអិលតាមបណ្តោយផ្លូវរត់ក៏ដោយ ក៏យន្តហោះបានផ្ទុះឆេះជាដុំភ្លើងឡើង បន្ទាប់ពីបានបុកជាមួយរចនាសម្ព័ន្ធបេតុងដែលកប់នៅក្នុងដីនៅចុងផ្លូវរត់ ជាឧបទ្ទវហេតុដែលបានឆក់យកជីវិតមនុស្ស ១៧៩នាក់នៅលើយន្តហោះ។ មានតែអ្នកបម្រើលើយន្តហោះ ២នាក់នៅផ្នែកកន្ទុយយន្តហោះប៉ុណ្ណោះដែលរួចជីវិតពីសោកនាដកម្ម។

លទ្ធផលសិក្សាធ្វើត្រាប់តាមផ្ដល់មូលនិធិដោយរដ្ឋាភិបាល ដែលបានចេញកាលពីដើមឆ្នាំនេះ បានរកឃើញថា អ្នកដំណើរទាំងអស់ នឹងនៅរស់រានមានជីវិត ប្រសិនបើមិនមានរចនាសម្ព័ន្ធបេតុងដែលគាំទ្រដល់ឧបករណ៍កំណត់ទីតាំង ជាប្រព័ន្ធអង់តែនស្ទង់មើលទិសដែលជួយដល់យន្តហោះ ក្នុងអំឡុងពេលចុះចត។

ហើយក្រុមប្រឹក្សាភិបាលសវនកម្ម និងអធិការកិច្ច បានឲ្យដឹងនៅក្នុងរបាយការណ៍មួយថា រចនាសម្ព័ន្ធបេតុង ត្រូវបានសាងសង់ដោយក្រសួងដឹកជញ្ជូន ខណៈដែលវា «មានការស្វែងរកការកាត់បន្ថយចំណាយ»។ របាយការណ៍នេះបានឲ្យដឹងថា ដីដែលផ្លូវរត់ និងតំបន់សុវត្ថិភាពចុងផ្លូវរត់របស់អាកាសយានដ្ឋាន Muan ត្រូវបានសាងសង់ឡើងមានលក្ខណៈជម្រាល។

របាយការណ៍សវនកម្ម បានបន្ថែមថា ជំនួសឲ្យការធ្វើឲ្យដីរាបស្មើ ដែលនឹងតម្រូវឲ្យមានការលើកដីថែមយ៉ាងច្រើន និងការចំណាយខ្ពស់ មន្ត្រីទាំងនោះបានជ្រើសរើសដំឡើងឧបករណ៍កំណត់ទីតាំង នៅលើរចនាសម្ព័ន្ធបេតុងដែលខ្ពស់ជាងផ្លូវរត់៕