ភ្នំពេញ ៖ ក្រសួងសុខាភិបាល និងអង្គការសហប្រជាជាតិ ប្រចាំព្រះរាជាណាចក្រកម្ពុជា ឈរលើគោលការណ៍រួមគ្នា ក្នុងការជួយសង្រ្គោះអាយុជីវិតប្រជាពលរដ្ឋកម្ពុជា ដោយមានភាពជឿជាក់រវាងគ្នា។

​ក្នុងជំនួបសម្តែងការគួរសម និងពិភាក្សាការងារនាទីសី្តការក្រសួង រសៀលថ្ងៃទី២៥ ខែមីនា ឆ្នាំ២០២២នេះ រវាងឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ជាមួយនឹងលោកស្រី Pauline Tamesis (ផូលីន ថាមហ៍ស៊ី) ប្រធានអង្គការសហប្រជាជាតិប្រចាំព្រះរាជាណាចក្រកម្ពុជា និងសូមជម្រាបលា ដែលលោកស្រី ត្រូវបានផ្លាស់ប្តូរការបំពេញតួនាទីជាអ្នកសម្របសម្រួលរបស់អង្គការសហប្រជាជាតិ ប្រចាំព្រះរាជាណាចក្រកម្ពុជា ទៅកាន់តួនាទីនៅប្រទេសវៀតណាម នាពេលខាងមុខនេះ។

ក្នុងជំនួបខាងលើនេះ លោកស្រី Pauline Tamesis បានសម្តែងអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលកម្ពុជា ក៏ដូចជាជូនចំពោះឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ដែលកន្លងមកបានផ្តល់នូវកិច្ចសហប្រតិបតិ្តការល្អជាមួយអង្គការសហប្រជាជាតិ និងស្ថិតក្នុងរយៈពេលរួមគ្នាឆ្លើយតបជាមួយ នឹងជំងឺកូវីដ-១៩ គឺអង្គការសហប្រជាជាតិ ក៏បានចូលរួមចំណែកជាដៃគូដ៏ល្អ ជាមួយនឹងក្រសួងសុខាភិបាល ក្នុងការឆ្លើយតបទៅនឹងជំងឺកូវីដ-១៩ផងដែរ។

ជាការឆ្លើយតបឯកឧត្តម សាស្រ្តាចារ្យ ម៉ម ប៊ុនហេង បានសម្តែងអំណរគុណក្នុងការជួយគាំទ្ររបស់អង្គការសហប្រជាជាតិប្រចាំព្រះរាជាណាចក្រកម្ពុជា នាពេលកន្លងមកនេះ ដែលមានបណ្តាអង្គការផ្សេងៗស្ថិតក្រោមឆ័ត្រ របស់អង្គការសហប្រជាជាតិ បានធ្វើកិច្ចការងារយ៉ាងច្រើន រួមគ្នាជាមួយនឹងក្រសួងសុខាភិបាល ដោយឈរនៅលើគោលការណ៍សំខាន់ៗ ជាពិសេសគឺការជួយសង្រ្គោះអាយុជីវិត ប្រជាពលរដ្ឋនៅក្នុងព្រះរាជាណាចក្រកម្ពុជា ដោយមានភាពជឿជាក់រវាងគ្នាទៅវិញទៅមកផង និងឈរនៅលើគោលការណ៍កិច្ចសហប្រតិបតិ្តការល្អជិតស្និទ ហើយអ្វីដែលជាការងារសំខាន់ថែមទៀតនោះ គឺការបន្តនូវកិច្ចសហប្រតិបតិ្តការ ថ្វីត្បិតតែលោកស្រី ជាអ្នកសម្របសម្រួលអង្គការសហប្រជាជាតិប្រចាំព្រះរាជាណាចក្រកម្ពុជា បានចាកចេញពីកម្ពុជា ដើម្បីទៅបំពេញបេសកកម្មនៅប្រទេសវៀតណាម កី្ត ក៏ប៉ុន្តែបុគ្គលិក ក៏ដូចជាអ្នកទទួលខុសត្រូវនូវការងារផ្សេងៗនៅក្នុងក្របខណ្ឌអង្គការសហប្រជាជាតិ នឹងបន្តនូវកិច្ចការផ្សេងៗ៕​អត្ថបទ ៖ រដ្ឋា