សហរដ្ឋអាមេរិក អ៊ីស្រាអែល និងអ៊ីរ៉ង់ នៅតែបន្តការវាយប្រហារតាមអាកាសដាក់គ្នាទៅវិញទៅមកនៅទូទាំងតំបន់មជ្ឈិមបូព៌ា នៅថ្ងៃពុធ (១១ មីនា) នេះដែលជាថ្ងៃទី១២ទៅហើយនៃសង្រ្គាម ខណៈរដ្ឋាភិបាលទីក្រុងតេអេរ៉ង់ ដែលកំពុងស្ថិតក្នុងស្ថានភាពឡោមព័ទ្ធ បានព្រមានថា កងកម្លាំងសន្តិសុខរដ្ឋរបស់ខ្លួន បានត្រៀមលក្ខណៈរួចរាល់ដោយ «ម្រាមដៃជាប់កៃកាំភ្លើង» ដើម្បីប្រឈមមុខនឹងបាតុកម្មឡើងវិញណាមួយដែលប្រឆាំងរដ្ឋាភិបាល។

បន្ទាប់ពីការទម្លាក់គ្រាប់បែកយ៉ាងធ្ងន់ធ្ងរបំផុតក្នុងតំបន់កាលពីថ្ងៃអង្គារកន្លងទៅ ភាគីជម្លោះបានបន្តការវាយប្រហារលើគោលដៅសត្រូវរៀងៗខ្លួននៅក្នុងអ៊ីស្រាអែល លីបង់ និងតំបន់ឈូងសមុទ្រ នៅព្រឹកព្រលឹមថ្ងៃពុធនេះ ខណៈសង្គ្រាម ដែលបានអង្រួនទីផ្សារសកល និងគំរាមកំហែងបង្កជាវិបត្តិថាមពលដ៏អាក្រក់ បានអូសបន្លាយជិតដល់ពីរសប្ដាហ៍ហើយ។

នៅព្រឹកព្រលឹមថ្ងៃពុធនេះ ប្រព័ន្ធផ្សព្វផ្សាយរដ្ឋរបស់អ៊ីរ៉ង់ រាយការណ៍ថា ការវាយប្រហារមួយជុំទៀតត្រូវបានធ្វើឡើងលើមូលដ្ឋានទ័ពអាមេរិក ក្នុងប្រទេសបារ៉ែន។ ចាប់ពីយប់ថ្ងៃអង្គាររហូតដល់ព្រឹកថ្ងៃពុធ ជនជាតិអ៊ីស្រាអែល រាប់លាននាក់ត្រូវបង្ខំចិត្តរត់ចូលក្នុងជម្រកគ្រាប់បែកជាបន្តបន្ទាប់ បន្ទាប់ពីកងទ័ពបានព្រមានថា អ៊ីរ៉ង់បានបាញ់មីស៊ីលសំដៅទៅរកអ៊ីស្រាអែល ដែលជាសញ្ញាបង្ហាញថា ទីក្រុងតេអេរ៉ង់នៅតែរក្សាសមត្ថភាពក្នុងការវាយប្រហារអ៊ីស្រាអែល បន្ទាប់ពីមានអរិភាពអស់រយៈពេលជិតពីរសប្តាហ៍មកនេះ។ ចំណែកអាមេរិក និងអ៊ីស្រាអែលវិញ ក៏នៅតែបន្តវាយប្រហារសន្ធាប់លើអ៊ីរ៉ង់ យ៉ាងខ្លាំងក្លាបំផុត។

ណៅក្នុងប្រទេសអ៊ីរ៉ង់ អាជ្ញាធរកំពុងតែបារម្ភពីការងើបឡើងវិញនៃបាតុកម្មប្រឆាំងរដ្ឋាភិបាល ដោយប្រមុខនគរបាលអ៊ីរ៉ង់ លោក Ahmadreza Radan បានព្រមានថា «នរណាក៏ដោយដែលចេញដើរតវ៉ាតាមដងផ្លូវតាមការស្នើសុំរបស់សត្រូវ នឹងត្រូវប្រឈមមុខជាមួយកងកម្លាំងរដ្ឋ ក្នុងនាមជាសត្រូវ មិនមែនជាអ្នកតវ៉ានោះទេ»៕