ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានថ្លែងថា មានខ្មែរមួយចំនួនបានតែសម្ដីខ្លាំងលើរាជរដ្ឋាភិបាលខ្លួនឯង និងនិយាយថាយ៉ាងនេះ យ៉ាងនោះ ប៉ុន្តែជាមួយបរទេសវិញ គឺឱនដាក់គេជ្រុល ។

ក្នុងឱកាសអញ្ជើញជា​អធិបតី​បិទសន្និបាត​បូកសរុបលទ្ធផលការងារ ឆ្នាំ២០២១ និងលើកទិសដៅ​ការងារឆ្នាំ២០២២ ​របស់ក្រុមប្រឹក្សាយុវជនគ្រឹះស្ថានឧត្តមសិក្សានៃ ​ស.ស.យ.ក នៅថ្ងៃទី២៥ ខែមីនា ឆ្នាំ២០២២ ឯកឧត្តម ហ៊ុន ម៉ានី បានមានប្រសាសន៍ថា​ នៅលើឆាកអន្តរជាតិ ​ពេលយើងតំណាងខ្មែរ ទៅនិយាយជាមួយបរទេសទាំងទ្វេរភាគី ឬពហុភាគី គេមិនខ្វល់យើងធ្វើអ្វីនៅក្នុងប្រទេសនោះទេ គេគៀបយើងតែសមត្ថភាពមួយគត់ ។

ឯកឧត្តម បានបន្តថា ពេលខ្លះមានខ្មែរមួយចំនួន ដោយសារចង់ឲ្យគេជួយពេក ហើយខ្លាច​គេ​មិនជួយ​ ទាល់តែដើរតួនាទីឱនបន្តិច ឬពេលខ្លះឱនជ្រុល តែមកដល់ខ្មែរវិញធ្វើខ្លាំងណាស់ ជា​មួយរាជរដ្ឋាភិបាល ខ្លាំងណាស់ជាមួយខ្មែរគ្នាឯង ប៉ុន្តែជាមួយបរទេសអត់ហ៊ានមួយគេ ។

ឯកឧត្តម ហ៊ុន ម៉ានី បន្ថែមថា ចំណុចដែលត្រូវចងចាំមិនភ្លេច ទី១. នៅលើឆាកអន្តរជាតិ គឺ​ទទួលភាពគោរពដោយស្មើមុខស្មើមាត់ ទី២. អាចការពារថែរក្សា និងអាចទាញផល​ប្រយោជន៍​ដើម្បី​ប្រទេសជាតិបាន​ ហើយចង់ឲ្យបរទេសឲ្យតម្លៃខ្មែរ ​ភាពជាតំណាង ​ក្នុងនាម​ជាប្រទេសអធិបតេយ្យ និងឯករាជ្យ ​មានតែសមត្ថភាពមួយគត់​ទៅនិយាយជាមួយគេ ។

ប្រធាន ស.ស.យ.ក បាន​សង្កត់ធ្ងន់ថា ​យើងត្រូវមានភាពច្បាស់លាស់​ ត្រូវ​ស្គាល់​ខ្លួនឯង ​ថា​មក​ពីណា​ ស្ថិតនៅទីណា ​ចំណុចខ្លាំងនៅទីណា ​ចំណុចដែលប្រឈម ​និងត្រូវកែនៅចំណុចណា តែទោះ​យ៉ាងណាក៏ដោយ​ មិនឱនក្បាលមុខគេ ត្រូវខិតខំប្រឹងប្រែងពុះពារទៅមុខ​ ដើម្បីដឹកនាំ ទទួល​ខុសត្រូវចំពោះជោគវាសនាប្រទេសជាតិ ៕ អត្ថបទ៖ បាន សុខរិទ្ធិ