ការវាយប្រហារដោយយានដ្រូន នៅក្នុងតំបន់ពាក់កណ្ដាលស្វយ័តឃឺដអ៊ីរ៉ាក់ បានសម្លាប់សមាជិកម្នាក់នៃក្រុមប្រឆាំងប្រដាប់អាវុធឃឺដអ៊ីរ៉ង់ នៅថ្ងៃពុធ (ទី១១ ខែមីនា ឆ្នាំ២០២៦) នេះ។ នេះបើយោងតាមការឲ្យដឹងពីគណបក្សនិរទេសខ្លួនរបស់លោក ដោយមន្ត្រីជាន់ខ្ពស់ម្នាក់មកពីក្រុមនេះ បានដាក់ការទទួលខុសត្រូវទៅលើអ៊ីរ៉ង់។

គណបក្ស Komala គឺជាក្រុមមួយ ក្នុងចំណោមក្រុមឃឺដអ៊ីរ៉ង់ជាច្រើនមានមូលដ្ឋាននៅអ៊ីរ៉ាក់ ដែលបានប្រឆាំងនឹងសាធារណរដ្ឋឥស្លាមជាយូរមកហើយ។ គណបក្សនេះបានឲ្យដឹងថា យ៉ាងហោចណាស់យានដ្រូនចំនួន ៨គ្រឿង បានវាយប្រហារទីតាំងរបស់គណបក្ស ដោយបានសម្លាប់យុទ្ធជនម្នាក់។

មន្ត្រីជាន់ខ្ពស់របស់គណបក្ស Komala លោក Ali Ranjder បានប្រាប់សារព័ត៌មាន AFP ថា ការវាយប្រហារ ២លើក បានវាយប្រហារតំបន់ Zrgwezala នៅជិតទីក្រុង Sulaimaniyah។ លោកបានដាក់ការទទួលខុសត្រូវទៅលើអ៊ីរ៉ង់។ លោកបានបន្ថែមថា យុទ្ធជន ២នាក់ ក៏បានរងរបួសផងដែរ ដោយម្នាក់ត្រូវបានបញ្ជូនទៅមន្ទីរពេទ្យទីក្រុងulaimaniyah។

មន្ត្រីម្នាក់ទៀតដែលនិយាយក្នុងលក្ខខណ្ឌមិនបញ្ចេញឈ្មោះបានប្រាប់សារព័ត៌មាន AFP ថា៖ «នេះគឺជាការវាយប្រហារដ៏ហិង្សាបំផុតលើមូលដ្ឋានរបស់យើង ចាប់តាំងពីការចាប់ផ្តើមសង្គ្រាម»។ ហើយលោកបានបន្ថែមថា៖ «យានដ្រូននៅតែហោះហើរ លើតំបន់នេះ»។

កាលពីថ្ងៃទី២៨ ខែកុម្ភៈ សហរដ្ឋអាមេរិក និងអ៊ីស្រាអែល បានចាប់ផ្តើមយុទ្ធនាការដ៏ធំមួយ ប្រឆាំងនឹងអ៊ីរ៉ង់ ដែលបង្កឲ្យមានសង្គ្រាមគ្របលើមជ្ឈិមបូព៌ា ចាប់តាំងពីពេលនោះមក។ ចាប់តាំងពីការចាប់ផ្តើមនៃសង្គ្រាមនេះ អ៊ីរ៉ង់បានវាយប្រហារទីតាំងរបស់ពួកសកម្មប្រយុទ្ធឃឺដម្តងហើយម្តងទៀត នៅក្នុងប្រទេសអ៊ីរ៉ាក់ ដែលខ្លួនចោទប្រកាន់ថា បម្រើផលប្រយោជន៍លោកខាងលិច ឬអ៊ីស្រាអែល៕