ប្រធានាធិបតីរ៉ូម៉ានី លោក Nicusor Dan បានកោះប្រជុំក្រុមប្រឹក្សាការពារជាតិជាន់ខ្ពស់របស់ប្រទេសដែលជាសមាជិកសហភាពអឺរ៉ុប (EU) និងអង្គការណាតូ (NATO) នៅថ្ងៃពុធ (ទី១១ ខែមីនា ឆ្នាំ២០២៦) នេះ ដើម្បីពិភាក្សា អំពីថា តើត្រូវអនុញ្ញាតឲ្យយន្តហោះអាមេរិកចូលទៅកាន់មូលដ្ឋានយោធារបស់ខ្លួន សម្រាប់ការគាំទ្រដែលភ្ជាប់ទៅនឹងប្រតិបត្តិការទីក្រុងតេអេរ៉ង់របស់ខ្លួនដែរ ឬយ៉ាងណា។ នេះបើយោងតាមការឲ្យដឹងពីប្រភពនយោបាយ។

ក្រុមប្រឹក្សានឹងជួបប្រជុំ ដែលជាលើកដំបូងនៅឆ្នាំនេះ ដើម្បីពិភាក្សា អំពីផលវិបាកសន្តិសុខ ដោយសារជម្លោះ នៅតំបន់មជ្ឈិមបូព៌ា ផលប៉ះពាល់របស់វាទៅលើទីផ្សារថាមពលរបស់ប្រទេសរ៉ូម៉ានី និង «ការដាក់ពង្រាយគ្រឿងយុទ្ធោបករណ៍បណ្តោះអាសន្ននៅលើទឹកដីរបស់រ៉ូម៉ានី»។

ការដាក់ពង្រាយនោះ ដែលប្រភពនយោបាយបាននិយាយដោយមិនបានបញ្ជាក់លម្អិតនោះ បានសំដៅទៅលើសំណើរបស់សហរដ្ឋអាមេរិក ដែលស្នើសុំប្រើប្រាស់មូលដ្ឋានទ័ពអាកាស Mihail Kogalniceanu។

ក្នុងពេលដែលប្រទេស EU មួយចំនួន ដូចជាបារាំង ក្រិក និងអ៊ីតាលីជាដើម បានបញ្ជូននាវាចម្បាំងទៅកាន់ប្រទេសស៊ីប បន្ទាប់ពីយានដ្រូនផលិតដោយអ៊ីរ៉ង់ បានវាយប្រហារមូលដ្ឋានទ័ពអង់គ្លេសនៅលើកោះនេះ ប្រទេសផ្សេងទៀត អនុញ្ញាតឲ្យប្រើប្រាស់មូលដ្ឋានទ័ពរបស់ខ្លួន។

កាលពីឆ្នាំមុន សហរដ្ឋអាមេរិកបានដកកងទ័ពប្រហែល ១.០០០នាក់ចេញពីមូលដ្ឋានទ័ពអាកាស Mihail Kogalniceanu របស់រ៉ូម៉ានី ខណៈដែលសហរដ្ឋអាមេរិកផ្តោតលើព្រំដែនរបស់ខ្លួន និងតំបន់ឥណ្ឌូ-ប៉ាស៊ីហ្វិក។ កងទ័ពអាមេរិក ១.០០០នាក់ទៀត នៅតែស្ថិតក្នុងប្រទេសរ៉ូម៉ានី។ វត្តមានអចិន្ត្រៃយ៍របស់សម្ព័ន្ធមិត្តនៅរ៉ូម៉ានី មានចំនួនប្រហែល ៣.៥០០នាក់នៃកងទ័ពអង្គការណាតូ ក្នុងនោះរួមមានទាំងទាហានអាមេរិកផងដែរ៕